අධික හිම පතනයෙන් සිරියාවේ කඳවුරුවල තත්ත්වය තවත් පීඩාවට

දින හතක් සහ මාස දෙකක් වයසැති දැරියන් ඉඩ්ලිබ් පළාතේදී මියගොස් ඇති බව එක්සත් ජාතීන්ගේ නිලධාරියෙකු ජාත්‍යන්තර පුවත් සේවයට පවසා ඇත.

රටේ දශකයක් පුරා පැවති සිවිල් යුද්ධයේදී තම නිවෙස් අතහැර පලා ගිය මිලියන 2.8 ක ජනතාවක් විරුද්ධවාදීන් සතුව පවතින බලකොටුවේ නවාතැන් පතා පැමිණ ඇත.

බොහෝ දෙනෙක් උණුසුම් ඇඳුම් සහ උණුසුම් කර ගැනීම සඳහා අවශ්‍ය අමද්‍රව්‍ය නොමැතිව කූඩාරම්වල ජීවත් වෙති.

සිරියාවේ දැඩි ආර්ථික පසුබෑමක් හේතුවෙන් වසරක් තුළ ආහාර ද්‍රව්‍ය මිල දෙගුණයක් වීම මෙන්ම ශීත සෘතු ආධාර සැපයීමට අරමුදල් හිඟවීම සහ අවශ්‍යතා වැඩි වීම හේතුවෙන් තත්වය වඩාත් නරක අතට හැරෙන බව එක්සත් ජාතීන්ගේ සංවිධානය අනතුරු අඟවා ඇත.

පසුගිය අඟහරුවාදා වාර්තා වූ බිළිඳුන් ඉඩ්ලිබ් නගරයට උතුරින් පිහිටි අල්-සියාරා සහ අල්-ෂෙයික් බහර් ප්‍රදේශවල කඳවුරුවල රැඳී සිට ඇත.

ප්‍රදේශයේ හිම නිසා ඔවුන්ගේ කූඩාරමේ වහලය කඩා වැටීමෙන් තවත් දරුවෙකු මිය ගොස් ඇත.

එක්සත් ජාතීන්ගේ සංවිධානයට අනුව, ජනවාරි 18, 19 සහ 25 යන දිනවල සිරියාවේ එම කලාපයට බල පෑ කුණාටු හේතුවෙන් ඉඩ්ලිබ් සහ ඇලෙප්පෝ හි අවතැන් වූවන් රැඳි සිටින කඳවුරු 287 ක් හිම පතනය, ගංවතුර සහ තද සුළං හේතුවෙන් පීඩාවට පත්ව ඇත.

හිම නිසා අවම වශයෙන් කූඩාරම් 935 ක් විනාශ වී ඇති අතර තවත් 9,500 කට වඩා හානි වී ඇත. වසර ආරම්භයේ සිට කඳවුරුවල ගිනි ගැනීම් වාර්තා 68ක් ද සිදුව ඇති අතර, එයින් පුද්ගලයන් දෙදෙනෙකු මිය ගොස් 24 දෙනෙකු තුවාල ලබා ඇති බව එක්සත් ජාතීන්ගේ සංවිධානය පවසයි.

බොහෝ විට මෙම ගිනිදැල් ඇති ව තිබුණේ උදුන රත් කිරීමට ගත් උත්සහායක් නිසාවෙනි.