කී දේ නාහන ඉන්දුනීසියානුවන් බය කරන්නට ‘කොරෝනා හොල්මන්‘ පාරට බසියි!

පාර අද්දර නොසිතූ තැන්වල සිටගෙන සහ වාඩිවී සිටින මේ සුදු ඇඳගත් හොල්මන්, අනපේක්ෂිත ලෙස හිටිහැටියේම පැන පැන යන්නට පටන් ගනියි.

මේ වනාහී, ඉන්දුනීසියාවේ ලොක්ඩවුන් නියමයන් කඩ කරමින් පාරට එන ගම්වැසියන් බිය වද්දන්නට ගෙන ඇති අලුත්ම පියවරයි.

පොලිසිය සමග එක්ව මේ පියවර ගෙන ඇත්තේ ගම්මානයේ ගම් ප්‍රධානියා සහ තරුණ කැළ විසිනි. සමාජ දුරස්ථකරණය ක්‍රියාවට නැංවීම සඳහා ඔවුන් විසින් ගෙන ඇති අලුත්ම නිර්මාණශීලී පියවර මෙයයි.

මේ හොල්මන් ඉන්දුනීසියානු බසින් හැඳින්වෙන්නේ ‘පොකොං‘ (pocong) යනුවෙනි. සුදු පාට සාළු පොරවාගත්, ඇස්වල අඳුන් තවරාගත් මේ රූප, මළවුන්ගේ ආත්මයන් උගුල්වලට හසුවී ඇති ආකාරය නිරූපණය කරයි.

මුලින්ම මේ පොකොංලා වීදියට පැමිණි විට ගම්වැසියන් එයට ප්‍රතිචාර දැක්වූයේ හාත්පසින්ම වෙනස් අන්දමකට ය. ඔවුන් කළේ බියවී සැඟවෙනු වෙනුවට පෙරහැරේ ගොස් ඔවුන්ව බලන්නට ඒකරාශී වීමයි. අනතුරුව රාත්‍රිය ඔවුන්ට භාර කෙරිණි. ඉන්පසු බොහෝ දේ වේගයෙන් වෙනස් වන්නට පටන් ගත්තේය.

ඉන්දුනීසියාවේ ජනාධිපති ජොකෝ විඩෝඩෝ (Joko Widodo) රට ලොක්ඩවුන් කිරීම සලකන්නේ නොකළ යුතු දෙයක් ලෙස ය. ඒ වෙනුවට පරිස්සම් වීම සහ සමාජ දුරස්ථකරණය සෑහේ යැයි ඔහු කල්පනා කර තිබේ. නමුත් මේ වනවිට ඉන්දුනීසියාවෙන් මරණ 373 ක් සමග රෝගීන් 4,241 ක් හමුවී ඇත.

ඉන්දුනීසියානු සරසවියේ පර්යේෂකයන් පිරිසක් පසුගියදා අවධාරණය කළේ දැඩි ක්‍රියාමාර්ග ගනිමින් ඔවුන් හික්මවූයේ නැති නම් මැයි මාසය වන විට මරණ 140,000 ක් සමග ආසාදිතන් ලක්ෂ 15 ක් වාර්තා වීමේ දැඩි අවදානමක් පවතින බවයි.

පවතින මේ වාතාවරණය තුළ ගැමියන්ම එක් වී වඩාත් දැඩි පියවර ගනිමින් සිය සහෝදර ගම්මුන් හික්මවන්නට තීරණය කර තිබේ.

ඒ නිසා මේ හොල්මන්වල රාජකාරි අතරට ගම්මුන් බියවැද්දවීමට අමතරව, ගම්මුන් සමාජ දුරස්ථකරණය නිසි ලෙස පවත්වා ගන්නේදැයි අධීක්ෂණය කිරීම ද ඇතුළත් ය.