මෝදි ට්විටර් හරහා කොරෝනා පාලනය කර පෙන්වයි!

ඒ අමුතු කොරෝනා පාලනය සිදුකෙරෙන්නේ 2000 වසරේ සිට බලාත්මක කර තිබෙන තාක්ෂණික පනත (Technology Act 2000) හරහා ට්විටර් සමාගම යොදවාගෙන අලුත්ම තත්වයේ භයානක කම ගැනත්, මෝදිගේ රෝග පාලනයේ අසාර්ථකත්වත් ගැන කියන ට්විටර් පෝස්ට්, ගළවා දැමීමට අණ කිරීම මගිනි.

ඊයේ දිනය තුළ ඉන්දියානුවන් 2800 කට වැඩි පිරිසක් කෝවිඩ් හේතුවෙන් මරණයට පත් ව තිබේ. ආසාදිතයන්ගේ සංඛ්‍යාව 352,991 ක් දක්වා ඉහළ ගොස් තිබේ. එනිසා දැන් මෝදි ට ඕනෑ නම් මෙසේ කියන්නටද පුළුවන.

‘‘මගේ හැකියාව තමයි දෙදාස්පන්සීයක්වත් දිනපතා මෝක්ෂයට යැවීම..!‘‘

දැන්, ට්විටර් සමාජ මාධ්‍යය තුළ ඉන්දියාවේ කෝවිඩ් තත්වයේ භයානක කම ගැන පෝස්ට් පළ වන්නේ ඉතා අඩුවෙනි. එයට හේතුව ඇතැම් පෝස්ට් ගළවා දමා ඇතිනිසා ය. එනම් බ්ලොක් කිරීම හෙවත් අවහිර කිරීම කර ඇති නිසා ය.

එක් ඉන්දියානු ට්විටර් පරිශීලකයෙක් මෙසේ කියයි.

‘‘ඔක්සිජන් රෝහල්වලට ලබාදෙනවට වඩා ට්විටර් පෝස්ට් ගළවන එක ලේසියි..‘‘

Because you know it’s easier to take down tweets than it is to ensure oxygen supplies.

Via Shuddhabrata Sengupta

"On the Centre's request, Twitter takes down 52 tweets criticising India's handling of the pandemic"

— Aftab Alam (@aftabistan) April 25, 2021

ගවමූත්‍රා පානයෙන් කෝවිඩ් සුව කළ හැකි බව කියන සෞඛ්‍ය ඇමති

ඉන්දියාවේ වසර 7 ක මෝදි පාලනය ජනතාව තුළ අවසානයේ මේ සිදුව ඇත්තේ කුමක්ද? මෝදිගේ ජව සම්පන්න සුන්දර කතා සියල්ල අබිබවා කෝවිඩ් විසින් ඔහුගේ නිරුවත පෙන්වමින් සිටියි. ලෝකයේ දුප්පත් රටවලට බෙදන්නට ඇස්ට්‍රා සෙනිකා කෝවිඩ්-19 එන්නත පූනේ පර්යේෂණාගාරයක සාදන (Covishield) භාරත මාතාවට අවසානයේ තමන්ගේ දරුවන් චීනයේ මෙන්ම මහපාරවල් ගානේ මැරී වැටෙන සැටි බලාගෙන සිටින්නට සිදුවී තිබේ. මේ කෝවිඩ්-19 දෙවැනි රැල්ල විසින් ඉන්දියාව තුළ නිර්මාණය කර තිබෙන්නේ ලෝකයේ වැඩිම වේගයකින් පුපුරා යමින් තිබෙන වෛරස් බෝම්බයකි. ඔක්සිජන් සැපයුම් අඩාල වී තිබෙන්නේ මන්දැයි තීරණය කිරීම දැන් ඉන්දියාවේ ශ්‍රේෂ්ඨාධිකරණය අතට ගෙන තිබේ. එය විසින් මේ සතියේ බ්‍රහස්පතින්දා වන විට සියලුම ප්‍රාන්තවලට සෞඛ්‍ය යටිතල පහසුකම් පිළිබඳ වාර්තා සපයන ලෙසට නියම කර තිබේ. කෙසේ නමුත් සෞඛ්‍ය ඇමති හර්ෂ් වර්දාන් කියන්නේ ගවමූත්‍රා පානයෙන් කෝවිඩ් සුව කළ හැකි බව ය!

නවතම වාර්තාවලට අනුව ට්විටර් සමාජ ජාලය ඉන්දියානුවන්ගේ පෝස්ට් ගළවන්නට පටන් ගන්නේ, බටහිර බෙංගාලයේ දේශපාලකයෙක්, ඉන්දියාවේ සිදුවන කෝවිඩ් මරණවල වගකීම මෝදි විසින් ගත යුතු බව පැවසූ වේලේ සිට ය. මේ අතර, මෝදි ජනමතය තමන්ගෙන් ගිලිහේ යැයි බියෙන් තවමත් දහස් ගණන් දෙනා සහභාගි වන ප්‍රචාරක රැළි පවත්වමින් යයි. #ResignModi #SuperSpreaderModi වැනි අලුත් හෑෂ්ටැග් ද සමග ඒවා ගැන ද විවේචන පළ වන්නට පටන් ගන්නා විටදී අදහස් ප්‍රකාශ කිරීමේ අයිතිය ද වළලා දමන්නට මෝදි තීරණය කර තිබේ. එක දවසක් ඇතුළත මතභේදාත්මක ට්විටර් පෝස්ට් 52 ක් අතුරුදන් වන්නේ මේ තත්වය තුළ ය.

භාෂණයේ සහ ප්‍රකාශනයේ අයිතිය ආදාහනය කිරීම

නරේන්ද්‍ර මෝදි ඉන්දියාවේ දෙවරක්ම අගමැති වුණේය. ඔහු ඔහුගේ අති මහත් ජනප්‍රියත්වයට ප්‍රධානතම හේතුවක් වූයේ ඔහු විසින් වැපිරූ ජාතිවාදයයි. වඩාත් නිශ්චිතව කියන්නේ නම් ‘මුස්ලිම් විරෝධය‘යි. හින්දුත්වාවාදය අදහන්නන් හට මෝදි දෙවියෙක් නොව දේවාලයකි. නමුත් දැන් ඒ සියලු දෙනා හින්දු-මුස්ලිම් භේදයකින් තොරව මෝදිගේ ඉන්දියාවේ ඉස්පිරිතාල අබියස පාරවල් ගානේ, හුස්ම ගන්නට ඔක්සිජන් නැති කම නිසා මැරී වැටෙමින් සිටිති.