බොරිස් ජොන්සන්ගේ ‘නත්තල්‘ තෑග්ග – ‘‘Get Brexit done‘‘
බොරිස් ජොන්සන්ට උදා වෙමින් තිබෙන්නේ නිකම්ම නත්තලක් නොවේ. ‘බ්‍රෙක්සිට් නත්තල‘කි.
ඔහු මේ නත්තල වෙනුවෙන් ලබා දී ඇති නත්තල් පොරොන්දුව වන්නේ ‘නත්තලට පෙර යුරෝපා සංගමයෙන් ඉවත් වීමේ ඩීල් එක නැවතත් බ්‍රිතාන්‍ය පාර්ලිමේන්තුව තුළට ගෙන එන බව‘ ය. එනම් වෙන් වී යාම සහතික කරන බව ය.
බ්‍රිතාන්‍ය මහ මැතිවරණය දෙසැම්බර් 12 වැනිදා පැවැත්වීමට නියමිතය. එහිදී කොන්සවේටිව් පක්ෂය වෙනුවෙන් බොරිස් ජොන්සන් ලබා දෙන ප්‍රධානතම ඡන්ද පොරොන්දුව මෙයයි. ‘යුරෝපා සංගමයෙන් ඉවත් වීම තවදුරටත් දික් ගස්සන්නේ නැත‘ යන අර්ථය ඒ තුළ තිබේ. ‘අලුත් බ්‍රිතාන්‍යයක් වාත්තු කරනවා‘ – forge a new Britain යැයි ද ඔහු මුරගාමින් කියයි. ට්‍රම්ප්ගේ making America great again’ සටන් පාඨය නිතැතින්ම සිහිගන්වන ඔහු, මේ වන විටත් කොන්සවේටිව් පාක්ෂිකයන් සිහින ලොවක ගිල්වමින් සිටියි.
පිටු 59 කින් යුක්ත ඔහුගේ කොන්සවේටිව් පක්ෂයේ මැතිවරණ ප්‍රතිපත්ති ප්‍රකාශය එළිදකින්නේ මහ මැතිවරණයට දින 18කට පෙර අද දින (නොවැම්බර් 25) ය.
එහි ඇති සෙසු පොරොන්දු අතර මහා බ්‍රිතාන්‍යයේ හෙදියන් සංඛ්‍යාව 50,000 කින් ඉහළ නැංවීම සහ පොලිස් නිලධාරීන් සංඛ්‍යාව 20,000 කින් ඉහළ නැංවීම ද තිබේ.
“Get Brexit done and we can focus our hearts and minds on the priorities of the British people,” බොරිස් ජොන්සන් කියන්නේ එසේ ය. ‘‘බ්‍රෙක්සිට් එක කරල ඉමු.. ඊට පස්සෙ අපේ හදවත් සහ මනස බ්‍රිතාන්‍ය මිනිස්සුන්ගෙ ප්‍රමුඛතාවන් වෙත යොමු කරන්න පුළුවන්..‘‘
එහි අදහස, බ්‍රිතාන්‍ය ජාතිකයන්ගේ ජීවන ප්‍රමුඛතාවන් පිළිබඳ අවධානය යොමු කිරීමට නම්, අන් සියල්ලටම පෙර බ්‍රෙක්සිට් ඩීල් එක අවහර කර ගත යුතු බව ය.
Withdrawal Agreement Bill යනුවෙන් මේ සඳහාම සකස් කර ගෙන ඇති කෙටුම්පත බ්‍රිතාන්‍ය පාර්ලිමේන්තුව මගින් (හවුස් ඔෆ් කොමන්ස්) පසුගිය ඔක්තෝබරයේදී සම්මත කරනු ලැබිණි. නමුත් මහ මැතිවරණය අබියස පාර්ලිමේන්තුව විසුරුවා හැර ඇති නිසා එය නැවත පාර්ලිමේන්තුවෙන්ම බලාත්මක කර ගත යුතුය. එනම් අපරානුමිත කළ යුතුය. එක්සත් රාජධානියට යුරෝපා සංගමයෙන් ඉවත් වීමට ලබාදී ඇති අවසන් දිනය 2020 ජනවාරි 31 ය. ඉන්පසු ස්ථිරසාර වෙළඳ පදනමකට එළඹෙන තෙක්, උපරිම වශයෙන් 2020 දෙසැම්බර් 31 දක්වා එක්සත් රාජධානිය ‘සංක්‍රාන්ති සමයක්‘ ගත කළ යුතුය.
ඒ අතරතුර කාලයේදී යුරෝපා සංගමයෙන් බෙදී වෙන් වී යාම නිසා එක්සත් රාජධානියට අහිමි වන්නට නියමිත දේ බොහෝ ය. පහත දැක්වෙන්නේ එයින් කිහිපයකි. මේ සියල්ල තිබියදීත් එක්සත් රාජධානි දක්ෂිණාංශය මස් රාත්තලම ඉල්ලමින් සිටියි.
ඉදිරි වසර 15 ක් සඳහා එක්සත් රාජධානියේ දළ දේශීය නිෂ්පාදිතය (GDP) 6.7%කින් ඉහළ යන බව බොරිස් ජොන්සන් පවසතත්…,
බ්‍රිතාන්‍ය ආණ්ඩුවේ සංඛ්‍යාලේඛන පෙන්වා දෙන්නේ ඉදිරි වසර 15 ඇතුළත දළ දේශීය නිෂ්පාදිතයට පවුම් බිලියන 130 ක පාඩුවක් සිදුවීමට නියමිත බවයි!
මෙම ඉවත් වීම වෙනුවෙන් එක්සත් රාජධානියට යුරෝපා සංගමය හට පවුම් බිලියන 39 ක් ගෙවීමට සිදුවනවා ඇත.
අවසානයේ 2019 මාර්තු 29 දින සිදුවිය යුතුව තිබූ, තෙරේසා මේ හට අගමැති ධුරය ද අහිමි කළ, බ්‍රිතාන්‍ය දේශපාලනය කුණාටුවකට මැදි කළ බ්‍රෙක්සිට්, බොරිස් ජොන්සන් නමැති ටර්මිනේටර් අතින් අවසානයක් දකින දිනය ළඟා වෙමින් තිබේ.
