කොලරාව හේතුවෙන් සුඩානයේ දහස් ගණනක් මිය යයි
සුඩානයේ කොලරාව සිඝ්‍රයෙන් ව්‍යාප්තවීමට හේතු වශයෙන් යුද්ධය මෙන්ම අධික වර්ෂාපතනය සහ ගංවතුර ද අවතැන් කඳවුරුවල ජනාකීර්ණ වීම ද හේතු වී තිබේ.
සටහන: සශිකලා මධුෂාණි
සැප්තැම්බර් 25; ලෝකය(අවුට්බවුන්ඩ් ටුඩේ) : වසරකට අධික කාලයක් යුද්ධයෙන් පිඩා විඳින සුඩානයේ පසුගිය මාසය තුළ කොලරාව හේතුවෙන් පුද්ගලයින් 430 කට වැඩි පිරිසක් මිය ගොස් 14,000ක පිරිසකට ආසාදනයව ඇති බව එරට සෞඛ්‍ය අමාත්‍යාංශය නිවේදනය කර තිබේ.
කොලරාව යනු වේගයෙන් වර්ධනය වන බෝවෙන රෝගයක් වන අතර ලෝක සෞඛ්‍ය සංවිධානයට (WHO) අනුව එය පාචනය, විජලනය සහ මරණයට හේතු විය හැක. එය සුව කිරීමට සාපේක්ෂව පහසු නමුත් ඉක්මන් ප්‍රතිකාර අවශ්‍ය වේ.
සුඩානයේ කොලරාව සිඝ්‍රයෙන් ව්‍යාප්තවීමට හේතු වශයෙන් යුද්ධය මෙන්ම අධික වර්ෂාපතනය සහ ගංවතුර ද අවතැන් කඳවුරුවල ජනාකීර්ණ වීම ද හේතු වී තිබේ. මේ වන විට රෝගය පැතිරීම වැළැක්වීම සඳහා ඇතැම් ප්‍රදේශවල පාසල්, වෙළෙඳසැල් වසා දමන ලෙසට දැනුම් දී ඇති අතර සෞඛ්‍ය පද්ධතියේ බිඳවැටීමෙන් වඩාත් දරුණු ලෙස පීඩාවට පත් වූවන් අතර ගැබිනි කාන්තාවන් සහ ළමයින් වේ.
2023 අප්‍රේල් මාසයේ සිට හමුදාව සහ ප්‍රබල පැරාමිලිටරි කණ්ඩායමක් වන වේගවත් ආධාරක බලකාය (RSF)රාජ්‍ය බලය අල්ලා ගැනීම සඳහා දරුණු අරගලයක් ආරම්භ කළ දා සිට සුඩානය යුද්ධයක පැටලී ඇත. එය එක්සත් ජාතීන්ගේ සංවිධානය විසින් ලෝකයේ දරුණුතම මානුෂීය අර්බුදයක් ලෙස හඳුනවා ඇති අතර යුද්ධය හේතුවෙන් මිලියන නවයකට අධික ජනතාවක් රටින් පලාගොස් ඇත.
