හංගේරියාවේ රාජ්ය අනුග්රහය සහිතව ගොඩනැඟෙමින් තිබෙන එල්ජීබීටී විරෝධය පිටුදැකීමෙහිලා හංගේරියාවේ සියළු රටවල තානාපති කාර්යාල එකට පෙළගැසී ඇති මේ මොහොතේ ප්රචණ්ඩත්වයෙන් තොරව එල්ජීබීටී ප්රජාවගේ නිදහස සුරක්ෂිත කිරීම සඳහා ඉකුත් ජූලි 19 වන සඳු දින විවෘත ලිපියකට අත්සන් තබා ඇත.
මෙම විවෘත ලිපියට, ආර්ජන්ටිනාව, ඕස්ට්රේලියාව, ඔස්ට්රියාව, බෙල්ජියම, කැනඩාව, චිලී, සයිප්රසය, ඩෙන්මාර්කය, එස්තෝනියාව, ෆින්ලන්තය, ප්රංශය, ජර්මනිය, ග්රීසිය, අයර්ලන්තය, ඊශ්රායලය, ඉතාලිය, ලැට්වියාව, ලිතුවේනියාව, ලක්සම්බර්ග්, මෝල්ටාව, මොන්ටිනිග්රෝ, නෙදර්ලන්තය, නවසීලන්තය, නෝර්වේ, පෘතුගාලය, ස්පාඤ්ඤය, ස්වීඩනය, ස්විට්සර්ලන්තය, එක්සත් රාජධානිය සහ එක්සත් ජනපදය යන රටවල් විසින් සහයෝගීතාවය දක්වා ඇත. පසුව එම ලිපිය හංගේරියාවේ සංස්කෘතික ආයතන 12 ක් විසින් අත්සන් කරන ලදී.
හංගේරියාවේ එක්සත් රාජධානි තානාපති කාර්යාලය ට්විටර් පණිවුඩයක් නිකුත් කරමින් – ඔවුන් එල්ජීබීටී ප්රජාවේ සාමාජිකයන්ට පූර්ණ සහයෝගය, සමානාත්මතාවය දක්වන මෙන්ම වෙනස්කොට සැලකීම, අදහස් ප්රකාශ කිරීමේ නිදහස කප්පාදු කිරීම, සාමකාමී රැස්වීම ඇහිරීම සහ ප්රචණ්ඩත්වයෙන් නිදහස් වීමේ අයිතිය පිළිබඳව පෙනී සිටින බවත්, නීතියේ ආධිපත්යයට ගරුකිරීම සහ විශ්වීය මානව හිමිකම් විශ්වීය බවට පිළිගන්නා බවත්, ඒවා සියලු මිනිසුන්ට සමානව අදාළ විය යුතු බවත්, කිසියම් පුද්ගලයකුගේ ලිංගික දිශානතිය හෝ ස්ත්රී-පුරුෂ සමාජභාවී අනන්යතාවය මත පදනම්ව ඕනෑම ආකාරයක වෙනස්කොට සැලකීමක් සිදුනොකළ යුතුය යන ස්ථාවරයේ පසුවන බවත් ප්රකාශ කර ඇත.
Human Rights are universal and should apply equally to all people. The UK is committed to the principle of non-discrimination on any grounds, including on the basis of sexual orientation or gender identity. pic.twitter.com/Nk56rHOvf6
— UK in Hungary (@ukinhungary) July 20, 2021
මේ වන විටත් හංගේරියාවේ එල්ජීබීටී විරෝධී අන්ත දක්ෂිණාංශික සහ ජාතිකවාදී අග්රාමාත්ය වික්ටර් ඕර්බන් ට එරෙහිව ප්රභල හඬක් යුරෝපා සංගමය ඇතුළු රටවල් වලින් නැගී තිබේ. ඒ ඔහු හංගේරියාවේ සිවිල් සංවිධාන තහනම් කිරීම, සමරිසි ලිංගික ක්රියා සහ සංක්රාන්ති සමාජභාවී පුද්ගලයින්ගේ අනන්යතාවය එරටින් මකා දැමීමට දරන උත්සාහය හමුවේ ය.
ඉකුත් දිනක දී සමලිංගිකත්වය කෞමරකාමය හෙවත් පෙඩොෆීලියාවට සමාන කරමින් හංගේරියාව තුළ නීතියක් සම්මත කර ගැනීමට මූලිකත්වය ගෙන කටයුතු කළේ ද ඕර්බන් මහතා ය. වයස අවුරුදු 18 ට අඩු පුද්ගලයින් කෙරේ සමලිංගිකත්වය ප්රවර්ධනය වීම තහනම් කිරීම මෙම නීතිය හරහා සිදුව තිබිණි.
ඒ තුළින් පාසල් වල එල්ජීබීටී ගැටළු ආමන්ත්රණය කිරීම තහනම් කිරීම, බාලවයස්කරුවන් දැකිය හැකි වෙළඳ දැන්වීම් හෝ මාධ්යවල ඕනෑම ආකාරයක එල්ජීබීටී නියෝජනයක් අන්තර්ගත වීම තහනම් කිරීමට ඕර්බන් ප්රමුඛ රජය කටයුතු කළේය.
එල්ජීබීටී පුද්ගලයින් ගේ අයිතිවාසිකම් වලට ගරු කිරීම සහ ආරක්ෂා කිරීම සෑම රාජ්යයකම තේරී පත්වන නායකයින්ගේ සහ රජයන්ගේ අවධානයට ලක්විය යුතු බව මෙම තානාපති කාර්යාල අවධාරණය කරයි.