අතිඋතුම් නායකතුමා අණ දුන්නොත් තොලොංචිකර දමනවා – ඉරානයේ විරෝධතාකරුවන්ට අවසාන අනතුරු ඇඟවීම හමුදාවෙන්!

ඉරානයේ දිනෙන් දින උත්සන්න වන ආණ්ඩු විරෝධී විරෝධතා හමුවේ එරට නායක අති උතුම් අයතුල්ලා අලි ඛමේනි විසින් විධානය ලබා දුන්නහොත් ජාතික මට්ටමෙන් එකී විරෝධතා මර්දනයකර දැමීමට කටයුතු කරන බව එරට හමුදාව පවසයි.

ඉරාන නායකතුමා විසින් නිසි විධානය ලබා දුන්නහොත්, ඉස්ලාම් ජනරජය තුළ කැරලිකරුවන්ට ඉඩක් ලබා නොදෙන බවත්, දැඩි තීරණයකට එළඹ ක්‍රියාකරන බවත් එරට යුධ හමුදා පාබල අණදෙන නිලධාරී කියුමාර්ස් හේදාරි ඊයේ (08) දින පැවසූ බවට ඉරාන රජයට හිතවාදී මාධ්‍ය ආයතනයක් වන මෙහ්ර් වාර්තා කර සිටියි.

එම පුවත් සේවය වාර්තා කරන අන්දමට, මේ සඳහා අවශ්‍ය වන්නේ ඉරානයේ අති උතුම් නායකතුමාගේ විධානය පමණක් බවත්, එකී විධානය හමුවේ දීප ව්‍යාප්තව කැරළි මර්දනය කර දැමීමට කටයුතු කරන බවත් ඔහු පවසා තිබේ.

ඉරානයේ සදාචාර පොලීසිය (morality police) විසින් බුර්කාව නිසි පරිදි පැළඳ නොසිටීමේ චෝදනාව මත අත්අඩංගුවට ගත් 22 හැවිරිදි කුර්දි-ඉරාන ජාතික කාන්තාවක් වන මාහ්සා අමීනි ගේ අභිරහස් මරණය සමඟ මෙම ජන අරගල උත්සන්න වූ අතර, මෙම ජන විරෝධතා මෑත ඉරානයේ හටගත් විශාලතම විරෝධතා ව්‍යාපාරය බවට වාර්තා වේ.

මේ සම්බන්ධයෙන් අයතුල්ලා අලි ඛමේනි ඉරාන නායකවරයා පවසා සිටියේ ඉරානයේ නවමු ව්‍යාපෘති සහ සංවර්ධන ශ්‍රේෂ්ඨත්වය අඩපණ කිරීමට සතුරා විසින් නිර්මාණය කරන ලද බොළඳ කැරැල්ලක් බවයි.

මේ වන විට ඉරාන ජන අරගල මර්දනය කිරීම හමුවේ පුද්ගලයන් 270 කට අධික පිරිසක් ජීවිතක්ෂයට පත්ව ඇති බවත්, 1,400 කට අධික පිරිසක් අත්අඩංගුවට පත්ව ඇති බවත් වාර්තා වේ.

ඡායාරූප: Sky News