BORDERS MAY DIVIDE US, BUT HOPE WILL UNITE US.
මායිම් අප වෙන් කළ ද, බලාපොරොත්තුව අප එක්කරයි.

පිටසක්වළින් ආ බව කියන ‘ආටා‘ මමියේ අබිරහස විවාදාත්මකයි

සාමාන්‍ය ජනයා අතර පමණක් නොව විද්‍යාඥයන් අතර පවා මහත් කූතුහලයක් ඇති කළ “ආටා” මමිය සම්බන්ධයෙන් මෑතකදී කළ පර්යේෂණ මතභේදාත්මක තැනකට තල්ලු වෙයි.

ඒ අනුව “ආටා” (Ata Mummy) මමියෙහි ජාන පිළිබඳව විද්‍යාඥයන් කළ පර්යේෂණ සාධාරණීකරණය කළ නොහැකි බවත්, පර්යේෂණ ආචාර ධර්මානුකූල නොවන බවත් පැවසේ. “ආටා” පිළිබඳ නවතම අනාවරණය කරගැනීම සඳහා චිලී රාජ්‍යයේ, නවසීලන්තයේ සහ තවත් රාජ්‍ය ගණනාවක විද්‍යාඥයෝ එක්ව සිටිති. නවතම සොයාගැනීම් පිළිබඳව අදහස් දක්වන නවසීලන්තයේ ඔටාගෝ විශ්වවිද්‍යාලයේ ජෛව පුරා විද්‍යාඥ මහාචාර්ය සියන් හල්ක්‍රෝ පවසන්නේ මෙවැන්නකි.

“…ආටා ගැන ජානමය විශ්ලේෂණයක් කරන්න ඕනෑම යැයි කියා විද්‍යාත්මක තර්කනයක් නැහැ. මමියේ අස්ථි සාමාන්‍ය අන්දමින්ම තිබෙනවා. හඳුනාගෙන තිබෙන ජාන විකෘතිතා අහඹු ලෙස සිදු වූ ඒවා. එලෙස හඳුනාගත් එකම එක ජාන විකෘතියක්වත් බරපතල අස්ථි රෝග සමඟ සම්බන්ධ වෙන්නෙත් නැහැ. …” යැයි කියා හෙතෙම පවසයි.

Youtube/ Cirus Documentry

Youtube/ Cirus Documentry

ආටා සම්බන්ධයෙන් මේ විග්‍රහ කිරීම එල්ල වන්නේ පසුගිය මාර්තුවේදී “ජීනෝම් රිසර්ච්” ජර්නලයෙහි පළ වී තිබුණු පර්යේෂණ පත්‍රිකාවේ අඩංගු කරුණුවලට එරෙහිවය.

ආටා මමිය සොයා ගැනුණේ ඇටකාමා කාන්තාරයේ චිලියට අයත් පෙදෙසකිනි. වර්ග කිලෝමීටර දහස් ගණනක සරියක් පුරා පැතිර ඇති දකුණු ඇමෙරිකාවේ ඇටකාමා කාන්තාරය ලොව ඇති වියළිම ස්ථානයක් සේ සැලකෙයි. මේ කාන්තාරයේ ඇතැම් තැන් මිනිස් අවශ්‍යතා සඳහා භාවිතයට ගැනුනද වැඩිමනත් ප්‍රදේශයක් පවතින්නේ ප්‍රයෝජනයට ගත නොහැකි මට්ටමෙනි. ඇටකාමා කාන්තාරයේ ඇතැම් පෙදෙස්වලට පිටසක්වල ජීවින්ගේ බලපෑම් එල්ලව ඇතැයි කියැවෙන මතයකුත් පතලව තිබේ. ඇටකාමා කාන්තාරයෙන් මතු වන ගූඪ ගුප්ත ස්වරූපය නිසාම එහි සිදුවන සමහරක් දෑ නූතන විද්‍යාවෙන් පවා විස්තර කළ නොහැකියැයි තවත් සමහරු පවසති. සාමාන්‍යය ජනයා අතර පවතින මේ කතාව 2003 වසරේදී සැබෑවක් බවට පත්වූයේ අත්භූත සහ අරුම පුදුම පෙනුමකින් යුත් මෘත දේහයක් මිනිසුන් අතට පත්වීමත් සමඟයි.

Ata Mummy| Sirius Disclosure

Ata Mummy| Sirius Disclosure

අඟල් හයක් (සෙන්ටිමීටර 15ක්) පමණ දිගැති මේ මෘත දේහය හමුවුණේ ඇටකාමා කාන්තාරයට ආසන්න චිලියෙහි පාළුවට ගිය ලා නොරියා නගරයෙනි. ලා නොරියා නගරය අත්හැර දමන ලද පතල්වලින් ගහනය. ඒවා, නයිට්රේට් බහුල පතල් බව සඳහන් වේ. මමියක් හැටියට සැලකුණු මෘතදේහය “ආටා” වශයෙන් පසුව නම් කෙරිණ. දේහය සොයා ගන්නා අවස්ථාවේදී එය සුදු රෙදි කඩක ඔතා දම් පැහැ පීත්ත පටියකින් ගැට ගසා තිබුණේය. අටකාමා කාන්තාරයට පිටසක්වල ජීවින්ගෙන් බලපෑමක් ඇතැයි කියන විශ්වාසය ඇටා මමිය හමුවීමත් සමඟම මිනිසුන් අතර තදින් කිඳා බැස ගත්තේය. අත්භූත මමිය පිළිබඳ පර්යේෂණ ආරම්භ වූයේ එය සොයා ගැනීමෙන් දස වසරකට පමණ පසුවයි. පර්යේෂණයට නායකත්වය දුන්නේ ඇමෙරිකාවේ කැලිෆෝර්නියා, සැන් ෆ්‍රැන්සිස්කෝ සහ ස්ටැන්ෆෝර්ඩ් විශ්වවිද්‍යාලවල විද්වතුන් පිරිසකි. ඇටා පිළිබඳව මේ පර්යේෂණ ආරම්භ වනවිට එය ස්පාඥ්ඥ ජාතිකයකු අතටත්, එතැනින් ඇමෙරිකා විද්‍යාඥයන් පිරිසක් අතටත් පත්ව තිබිණ. ඇටා මමිය එසේ රටින් රටට රැගෙන යෑම පමණක් නොව චිලියෙන් බැහැර කිරීමත් නිත්‍යානුකූලව සිදු නොවූ බවට තර්කයක් දැන් ගොඩනැඟී ඇත. එමෙන්ම පළමුව සිදු කෙරුණු පර්යේෂණ කිසිවක් නොසිදුවිය යුතුව තිබුණේ යැයි කියාත් මතයක් ඇති වී තිබේ.

කැලිෆෝර්නියා, සැන් ෆ්‍රැන්සිස්කෝ සහ ස්ටැන්ෆෝර්ඩ් විශ්වවිද්‍යාලවල විද්වතුන් සිය පර්යේෂණයේදී වැඩි අවධානයක් යොමුකර තිබුණේ ඇටා මමියෙහි ජාන වෙතය. ඔවුන් කියා සිටියේ ඇටා මමිය මෙයට වසර 40කට ඉහතදී ජීවත්වුණු ගැහැණු ළමයෙකුගේ දේහයක්යැයි කියාය. ඒ බව විද්‍යාඥයන් තහවුරු කරගෙන තිබුණේ ඇටාගේ අස්ථිවලිනි. ඇටා අවුරුදු 6ත් 8ත් අතර වයසක පසු වූ දැරියකට අයත් බැව් විද්‍යාඥයෝ විටෙක විශ්වාස කළහ. මේ මතය පරයා නවතම කරුණු ඉදිරිපත් කරන විද්‍යාඥයන් පවසන්නේ යනු මිමියක් බවට පත්වුණු සති පහළොවක් පමණ වයසැති ගබ්සා කළලයකැයි කියාය.

මනුෂ්‍යයකුට පර්ශු (ඉළ ඇට) යුගළ 12ක් තිබිය යුතු වුවත් ඇටාගේ දේහයේ තිබෙන්නේ පර්ශු යුගල 10ක් පමණෙකැයි කියා පළමුව පර්යේෂණ පැවැත් වූ විද්‍යාඥයෝ සමූහය කියා සිටියහ. ඇටා සම්බන්ධයෙන් දැනට සොයා බැලීම් කරන විද්වතුන් කියන්නේ, කළලයේ වයසට අනුරූප පර්ශු යුගළ සංඛ්‍යාව ආටා මමියෙහි පවතින බවකි. ඒ අනුව කළලයේ පර්ශු යුගල 10ක් තිබීම පුදුමයට කාරණයක් ද නොවේ.

Sirius Disclosure

විද්‍යාඥයන් එදා සිටම මවිතයට පත් වූයේ, ආටා ගේ හිසෙහි හැඩය නිසයි. මමියේ හිස දිගුවූත් කේතු ආකාරවූත් ස්වරූපයකින් යුක්තය. දැනට කෙරෙන පර්යේෂණවලින් තහවුරු වන්නේ නිසි වයසට පළමුව මවගේ ගර්භාෂයෙන් බැහැර වන කළලයක හිසෙහි එවැනි හැඩයක් දැකිය හැකි බවකි. එනිසා එය ද සාමාන්‍ය තත්ත්වයකි.

නූතන විද්‍යාවෙන් පවා අනාවරණය කර නොගත් සංකීර්ණ දේහයක් ඇටාට උරුම තිබූ බැව් කලින් පර්යේෂණ කළ විද්‍යාඥයන්ගේ මතය විණ. එවැන්නක් මනුෂ්‍ය දුවකට උරුම වුණේ ජාන විකෘති රාශියක් නිසා බව ඒ විද්‍යාඥයෝ පිරිස පෙන්වා දුන්හ. ඇටාගේ අස්ථි පද්ධතිය ආශ්‍රිතව විකෘති 64ක් තිබුණු බවත් ඔවුහු තහවුරුව කළෝය. මේ විකෘති 64 හටගෙන තිබෙන්නේ ජාන 7ක් මුල් කරගෙන බව ඔවුන්ගේ නිගමනය වී තිබිණ. ආවේණිය හා බද්ධ එකී විකෘතිතා නිසා ඇටාගේ දේහය අඟුටු මිටි ස්වරූපයකට පත්ව තිබෙන්නට ඇතැයි කියාත් ඒ පළමු විද්වත්හු පිරිස තීරණය කර තිබුණහ. එමෙන්ම අස්ථිවල ස්වරූපය සහ වර්ධනය ආශ්‍රිත ගැටළු රාශියකුත් පැවැති බවට සාක්ෂි ඇතැයි කියා ඔවුහූ පෙන්වා දුන්නෝය. ඇටා අඟුටු මිටි තත්ත්වයට පත් කරන්නටත් ඇගේ දේහයේ පර්ශු සංඛ්‍යාව අඩු කිරීමටත් විකෘති 64න් 10ක්ම හේතු වී ඇති බව සැන් ෆ්‍රැන්සිස්කෝ විශ්වවිද්‍යාලයේ පර්යේෂිකා සන්චිතා භාට්ටාචාර්ය එවර පෙන්වා දුන්නාය. ඇටා පිළිබඳ නවතම සොයා බැලීම්වලට අනුව මේ කිසිවක් සත්‍ය නොවේ. ඇටාගේ අස්ථි සහ වයස ගැන තීරණය කරන්නට පර්යේෂිකා සන්චිතා භාට්ටාචාර්ය සහ පිරිස භාවිත කර ඇති පර්යේෂණාත්මක ක්‍රමවේදයන් පවා නිවැරදි නොවන බව වත්මන් පර්යේෂණ කණ්ඩායම පවසති.

YouTube

YouTube

ආටා ගේ විකෘති ස්වරූපය දුටු පමණින්ම මව, ඇටාව කාන්තාරයේ පාළු තැනකට විසිකර දැම්මද? එහෙමත් නැත්නම් ඇයගේ දේහය සංරක්ෂණය කර තබා කාට හෝ විකුණා දැමුවා ද? යන්න ගැන සැකයක් කලින් පැවැතියේය. ඇටා ගැන දැනට කෙරෙන පර්යේෂණවලින් හෙළි වන කරුණු අනුව මේ කාරණා ද හුදෙක් හිතළු පමණි. නවතම කරුණු අනුව ඇටා යනු ගබ්සා වුණු කළලයක කොටස්ය. එසේ නම් තමන්ට ගබ්සා වුණු කළලය අම්මා, කිසිදු වග විභාගයක් නැතිවම විසි කර දැම්මද? යන ප්‍රශ්නය පැන නැඟේ.

ආටා අවුරුදු හතළිහකට පමණ පෙර ගබ්සා වුණු කළලයක් නම් ඒ කළලය දරා සිටි අම්මා අදටත් ජීවතුන් අතර සිටිනවා විය හැකිය. අම්මා නොසිටියත් ආටාගේ ඥාතීන් කවරකු හෝ ජීවත්ව සිටින බව නම් විශ්වාසය. කොහොම වුණත් ඇටාට ඥාතිත්වයක් දක්වන ඒ කවරකු හෝ සොයා ගැනීම මේ කවර විද්වතුන් කණ්ඩායමකටවත් පහසු නොවනු ඇත.


රිචඩ් බ්‍රැන්සන් උඩු ගුවනට යන බව ‘The Simpsons’ 2014 දීම කියලා!

ලෝකයේ උසම කොරල් පරය හමුවෙයි: උස කිලෝමීටර බාගයක් !

බූවල්ලෙකුට පෙම් බැඳි මිනිසා – ‘My Octopus Teacher‘ – ‘ඇදුරුතුමියයි ප්‍රේමයේ ඔබ..‘

ඩයිනසෝරයන්ගේ යුද්ධ ටැංකිය – අන්කිලෝසෝරස් මැග්නිවෙන්ට්‍රිස් නොහොත් ‘යගදාවා‘

පෘථිවියටත් සෙනසුරුට මෙන් රැස් වළලු තිබුණා නම්…

ඉන්දියාවේ සිට ලන්ඩනයට බස් සේවාවක් – ලොව දිගම බස් සේවය 2021 මැයි මස ඇරඹෙයි

ලිවර්පූල් පාපන්දු සමාජයට ගිය සික්ස් පැක් ඇති පුංචි මෙසී

අපේ ලෝකය කොරෝනාවලින් වැසී යද්දී දුරස්ථ ග්‍රහලොවකට අසිරිමත් යකඩ වැස්සක්

error: Content is protected !!
error: Content is protected !!