‘බැට්මෑන් මායා රජු‘- ‘කැමසොට්ස්‘ගේ අබිරහස හෙළිවෙයි!
පසුගිය දිනවල සමාජ ජාලවල විදුලි වේගයෙන් යම් පුවතක් සහ ලිපියක් සංසරණය වුණා.
එයින් කියැවුණේ නූතන චිත්‍රපට ෆැන්ටසියක් සහ පොප් සංස්කෘතියේ සුපිරි වීරයෙක් වන ‘බැට්මෑන්‘ ගේ හැඩහුරුකමට අතිශයින්ම සමාන සැබෑ මායා රජු කෙනෙක් මේ ලෝකයේ ජීවත් ව ඇති බව හෙළි වී ඇත කියායි.
මේ කතාවේ සුළමුල අවුට්බවුන්ඩ් ටුඩේ පාඨකයන් වෙනුවෙන් අපි සොයා බැලුවා.
මේ සමග දැක්වෙන ප්‍රධාන ඡායාරූපය කැමසොටා මායා රජුගේ බව සඳහන් වන මුල්ම පුවත පළ වන්නේ 2019 මැයි මාසයේ Yucatan Times සහ Curiousmos වැනි ප්‍රකාශනවලයි.
කැමසොට්ස් මායා රජුගේ සත්‍ය තොරතුරු ඒ ලිපිවල අන්තර්ගත වුණත්, මේ රූපය පළ කිරීම මගින් එම ප්‍රකාශන විසින් පාඨකයන් නොමග යවා තිබෙනවා. සැබවින්ම එය සිදුව තිබෙන්නේ එහි අඩංගු කැප්ෂනය නිසයි. එයට අනුව, මේ ප්‍රතිමාව, එසේත් නැතිනම් පිළිරුව අවුරුදු දහස් ගණනක් පැරණි එකක්!
වවුලෙකුගේ ස්වරූපයෙන් යුත් මායා දෙවියෙකු මායා පුරාවෘත්ත තුළ හමුවන බව සත්‍යයක්. එම දෙවියාගේ නම කැමසොට්ස් බවත් සත්‍යයක්. Camazotz නමුත් මේ ප්‍රතිමාව නම් මායාවරුන් ලොව විසූ ක්‍රි.ව. 500 යුගයේදී නිර්මාණය කළ එකක් නෙවෙයි. එය ඇත්තෙන්ම 2014 වසරේදී කිම්බෝල් – Kimball නමැති කලාකරුවෙක් විසින් මෙක්සිකෝවේ ‘මියුසියම් ඔෆ් ඩිසයින්‘ කෞතුකාගාරය වෙනුවෙන් කළ නූතන කලා නිර්මාණයක්. එහිදී සිදුකර තිබෙන්නේ මෙක්සිකානු නිර්මාණශීලිත්වය තුළින් බැට්මෑන්ගේ චරිතය දෙස බැලීමක්.
ලෝ ප්‍රකට Warner Bros Entertainment සමාගම, ඉහත කී මෙක්සිකානු කෞතුකාගාරය සමග එක් වී කලාකරුවන් 30 දෙනෙකුට 2014 වර්ෂයේදී “BATMAN THROUGH MEXICAN CREATIVITY” යන ව්‍යාපෘතිය සඳහා කලා නිර්මාණ ඉදිරිපත් කරන ලෙසට ඇරයුම් කරනවා. ඒ, බැට්මෑන් මායා දෙවියන්ව ෆයිබර්ග්ලාස් වලින් ප්‍රතිනිර්මාණය කරමින් කෞතුකාගාරයේ 75 වන සංවත්සරය සැමරීම නිමිති කර ගනිමින්.
මායානු පුරාවෘත්තවල අපට හමුවන කැමසොට්ස් නමැති වවුලෙකුගේ ස්වරූපයක් දරන මායා දෙවියා රාත්‍රිය සහ අන්ධකාර පාතාල ලෝකය සමග ඈඳී ඇති චරිතයක්.මේ නමෙහි අර්ථය මායා ශිෂ්ටාචාරයේ මිනිසුන් භාවිතා කළ කීයෙක් භාෂාවට අනුව “death bat” – හෙවත් ‘මරණයේ වවුලා‘ යන අර්ථය ලබා දෙනවා.
දෑත් විහිදාගෙන සිටින ස්වරූපය අනුව වවුලෙකු මෙන් නිරූපණය වන මෙම මායා දෙවියා, ග්වාතමාලාවේ ග්වාතමාලා සිටි අගනුවර Museo Popol Vuh නමැති කෞතුකාගාරයේදී දැක ගන්නට ලැබෙන්නේ මෙහෙමයි!
කැමසොට්ස් මායා දෙවියන් ගැන ‘බැට්මෑන්‘ චිත්‍රපටයේ සම්බන්ධය මේ අනුව ප්‍රශ්නකාරී වුණත්, කැමටොස් වැනි දෙවියෙක් මෙක්සිකෝවේ ජනප්‍රිය කොමික් කතා මාලාවක් වන
Hellboy හි දැකගන්නට පුළුවන් වුනා. ඒ වගේම 2019 වසරේ තිරගත වූ මරියෝ ඩි ලා රෝසා රංගනයෙන් එක් වන Hellboy චිත්‍රපටයේත් සැබෑ බැට් දෙවියාට බොහෝ සබඳකම් ඇති චරිතයක් දැකගන්නට ලැබුණා.
ඉතින් පසුගිය කාලයේ අන්තර්ජාලය හා සාමාජ ජාල තුළ ‘වයිරල් ඉමේජයක්‘ බවට පත්වූ මේ ඡායාරූපය, සැබවින්ම මේ දෙවියන්ගේ ස්වරූපයට වඩා හාත්පසින්ම වෙනස් එකක් බව ඔබට පෙනෙනවා ඇති. මායා ශිෂ්ටාචාරයට අයත් මිනිසෙක් මේ නව නිර්මාණය දුටු විට තමන්ගේ ‘බැට් දෙවියන්‘ ව හඳුනා නොගන්නට පවා ඉඩ තිබෙන්නේ ඒ නිසයි!
