හොලිවුඩ් තරු ද ඇතුළුව 250,000 කගේ නිවෙස් ලැව්ගින්නට බිලි!
ෂර්, ලේඩි ගාගා, කිම් කර්ඩෂියන්, කන්යේ වෙස්ට්, ගුලියාමේ ඩෙල් තෝරෝ කැලිෆෝනියාවේ පාලනයකින් තොරව පැතිර යන ලැව් ගිනි හේතුවෙන් ආරක්ෂිත ස්ථාන කරා ගොස් සිටිති.
උතුරු හා දකුණු කැලිෆෝනියා ජනපද සිසරා පැතිර යන මෙම විශාල ලැව් ගින්නෙන් මේ දක්වා අවම වශයෙන් පුද්ගලයන් 9 දෙනෙක් ජීවිතක්ෂයට පත්ව සිටිති.
කැලිෆෝනියාවේ පැරඩයිස් ප්‍රදේශයේ පමණක් 35 දෙනෙක් ආගිය අතක් නැත.
දකුණුදිග වෙරළ පාරාදීසයක් වන මාලිබු යනු, බොහෝ හොලිවුඩ් තාරුකාවන්ගේ මන්දිර පිහිටා තිබෙන පෙදෙසයි. මේ වන විට මාලිබු හි වැඩි කොටසක් ගිනිබත් වී තිබේ.
BBC
පසුගියදා පුද්ගලයන් 12 දෙනෙකුට මරු කැඳවමින් උන්මත්තක සුදු ජාතික තරුණයෙකු විසින් වෙඩි තැබීම සිදුකළ තවුසන්ඩ් ඕක්ස් ප්‍රදේශය ද අවදානම් කලාපයක් ලෙස ප්‍රකාශයට පත් කර තිබේ.
කැලිෆෝනියා ආණ්ඩුකාර කාර්යාලය මෙසේ පවසයි. ‘‘සිදුවී තිබෙන මහා විනාශයේ තරම, සිතාගත නොහැකි තරම්.‘‘
USA Today
මේ ඇමරිකානු ජනපති ඩොනල්ඩ් ට්‍රම්ප්, කැළෑ කළමනාකාරණය නිසි පරිදි කර නැති වීම මේ ලැව්ගිනිවලට හේතුව යැයි බලධාරීන්ට දොස් කියා තිබේ. වනාන්තර කළමනාකරණය සඳහා වෙන් කර ඇති අරමුදල් කපා හරින බව ද ඔහු කියා ඇත.
කාලගුණ විශේෂඥයන් පවසන්නේ ලබන සතිය පුරාවට ද මෙම අවදානම් සහගත ලැව්ගිනි තත්වය පැවතිය හැකි බවයි.
REUTERS
මේ වන විට මාලිබු හි ජනාකීර්ණ ප්‍රදේශ දක්වා ලැව් ගින්න ඇදී යමින් තිබෙන අතර, සියලුම ජනතාවට ප්‍රදේශයෙන් ඉවත් වන ලෙසට දැනුම් දී තිබේ.
පසුගිය බ්‍රහස්පතින්දා මධ්‍යම ලොස් ඇන්ජලීස් නගරයට සැතපුම් 40 ක් පමණ දුරින් පිහිටි තවුසන්ඩ් ඕක්ස් අසල ලැව් ගිනි හටගත්තේය. ඒ සමගම ඒ අසල පිහිටා තිබෙන හිල් ෆයර් ප්‍රදේශය ද ගිනි ගන්නට පටන් ගත්තේය. සිකුරාදා වන විට Highway 101 ප්‍රදේශයට ලැව්ගිනි පැතිරුණේය. ඉන්පසු ඒවා වෙරළබඩ දක්වා පැතිරී ගියේය. මේ වන විට මෙම ලැව්ගිනි කලාපය හෙක්ටයාර 14,150 ක් හෙවත් අක්කර 35,000 ක් දක්වා පැතිරී තිබේ.
ට්විටර් හරහා කිම් කර්ඩෂියන් පවසා තිබෙන්නේ රැප් ගායක කන්යේ වෙස්ට් සමග තමන් ජීවත් වූ නිවස ගින්නට හසු වී දැවී ගිය බවයි.
ලස් වේගස් හි ප්‍රසංගයකට සහභාගි වෙමින් සිටි සුපිරි ගායක ෂර්, මාලිබු හි පිහිටා තිබෙන සිය නිවස ගැන දුක්වන බව ද ට්විටර් හරහා පෙනී ගියේය.
ගායිකා ලේඩි ගාගා, තමන් මාලිබු හි නිවෙස අතහැර ගිය බව ඉන්ස්ටර්ග්‍රෑම් හරහා කියා සිටි අතර, ඇය විසින් පෝස්ට් කළ වීඩියෝවේ කළු පාට දුමාරය පසුබිමින් දැක්වේ.
ඔස්කාර් සම්මානලාභී අධ්‍යක්ෂ ගුලියාමෝ ඩෙල් තෝරෝ ට්වීට් කර තිබෙන්නේ තමන්ගේ අගනා කෞතුක වස්තු සහ ෆැන්ටසි/හොරර් භාණ්ඩ එකතුවක් අත හැර දමා තමන් නිවසින් පළා ආ බවයි.
මෙම ගින්න හේතුවෙන් Westworld රූපවාහිනී මාලා නාටකය සඳහා යොදාගත් පසුතලයක් ද සම්පූර්ණයෙන් විනාශ වී ගොස් ඇති බව පැවසේ.
අක්කර 20,000 ක භූමි භාගයක් ගිල ගනිමින් බ්‍රහස්පතින්දා දිනයේම ප්ලූමස් ජාතික වනෝද්‍යානයෙන් ගින්නක් හටගත් අතර, එය මද වේලාවකින් අසල පිහිටා තිබෙන පැරඩයිස් නරගය වෙත ද පැතිරුණේය.
‘‘කිසිම දෙයක් ඉතුරු වෙලා නෑ“ යැයි ගිනි නිවන භටයෙක් පැවසුවේය.
මේ අතර බීබීසී පුවත්සේවයේ ජේම්ස් කුක්, කැලිෆෝනියාවේ පැරඩයිස් නුවර සිට මෙසේ ලියයි.
‘‘පාරාදීසය (පැරඩයිස්) දැන් අපායක් වී තිබේ.!“
