BORDERS MAY DIVIDE US, BUT HOPE WILL UNITE US.
මායිම් අප වෙන් කළ ද, බලාපොරොත්තුව අප එක්කරයි.

තායි බිලියනපතියා රූප සුන්දරිය සමඟ අවසන් නින්දට !

බ්‍රිතාන්‍යයේ ලෙස්ටර් සිටි පාපන්දු සමාජයේ හිමිකරු, කෝටිපති ව්‍යාපාරික විචායි ශ්‍රීවඩ්ඩනප්‍රභා ගුවන් අනතුරකින් ජීවිතක්ෂයට පත් වෙයි.

අනතුරට පත්ව තිබෙන්නේ විචායි සහ තවත් පුද්ගලයන් සිව්දෙනෙකු රැගත් ඔගස්ටාවෙස්ට්ලෑන්ඩ් AW 169 දරණ හෙලිකොප්ටර් යානයයි. හෙලිකොප්ටරය ගුවන් ගත කෙරී ඇත්තේ ලෙස්ටර් සිටි ක්‍රීඩා සමාජයට අයත් කින්ග් පවර් ක්‍රීඩාංගනයෙනි.

යානය ගුවන් ගත වීමෙන් ස්වල්ප වෙලාවකට පසු අනතුර සිදුව තිබේ. යානයේ ගමන් ගත් පස් දෙනාම අනතුරෙන් ජීවිතක්ෂයට පත් වූහ.

අනතුර සිදුවූයේ, කින්ග් පවර් ක්‍රීඩාංගනදී ලෙස්ටර් සිටි සහ වෙස්ට් හැම් යුනයිටඩ් කණ්ඩායම් අතර පාපන්දු තරගයක් නිම වීමෙන් පැයකට පමණ පසුවය. මේ නිසා තරගය නරඹන්නට පැමිණි 31,000කට අධික ප්‍රේක්ෂකයන් අනතුර සිදුවන අවස්ථාවේදී ක්‍රීඩාංගනය අවට කලබලකාරී මහා මාර්ගවල ගමන් ගනිමින් සිටි බව සඳහන් වේ. ගුවන් අනතුර ඇසින් දුටුවන් පවසන්නේ යානය පාලනයෙන් මිදෙන්නට පටන් ගත් බවකි. යානය කඩා වැටෙන්නට පළමුව එය ජන ශුන්‍ය පෙදෙසක් වෙත යොමු කරගන්නට ගුවන් නියමුවා සෑහෙන වෙහෙසක් ගෙන තිබේ. එසේ නොවිණි නම් ඒ අවස්ථාවේදී මහා මාර්ගවල ගමන් ගනිමින් සිටි විශාල පිරිසක් අනතුරට ලක්වන්නට ඉඩ තිබුණු බව සඳහන් වේ. පාලනයෙන් මිදී තිබුණු යානය මහා හඬක් නංවමින් ගිනි බෝලයක් බවට පත්ව කඩා වැටුණේ යැයි සිද්ධිය ඇසින් දුටුවෝ පවසති. යානයේ ගමන් කරමින් සිටි පස්දෙනාම අනතුරෙන් එතැනම ජීවිතක්ෂයට පත් වුවත් මහා මාර්ගවල සිටි කිසිවකුට අනතුරක් සිදු වී නැත.

විචායි සමඟ යානයේ සිටි අනෙක් සිව්දෙනා අතර පනස් තුන් හැවිරිදි ගුවන් නියමු එරික් ස්වාෆර් (Eric Swaffer) සහ ඔහුගේ පෙම්වතිය – හතළිස් හය හැවිරිදි ඉසබෙලා ලිචෝවික්ස් (Izabela Lechowicz) සිටි බව සඳහන් වේ. ඉසබෙලා සහය නියමුවා හැටියට කටයුතු කර ඇත. හෙලිකොප්ටර් යානය, විචායිට අයත් එකක් වූ අතර එය නිතරම පැදවූයේ ගුවන් නියමු එරික්ය. යානය තුළ මඟීන් ලෙස විචායි සමඟ සිටියේ ඔහුගේ නිරන්තර සහායකයන් වූ කවෙපොර්න් පුන්පාරේ සහ තායි රූප සුන්දරියක වූ නුර්සාරා සුක්නමයි යන දෙනෙනායි. කවෙපොර්න් පුන්පාරේ කටයුතු කර තිබෙන්නේ විචයිගේ සහයකයා හැටියටය.

නුර්සාරා 2005 වසරේදී විශ්ව රූ රැජිණ තරගය සඳහා ඉදිරිපත් වන තායි රූමතිය තෝරා ගැනීමේ තරගයට පෙනී සිටි තරගකාරියෙකි. එම තරගයෙන් දෙවන තැන හිමිකරගන්නට සමත්ව ඇත්තේ නුර්සාරා ය. විචායිට අයත් ආයතනයක නුර්සාරා සේවය කළ බව සඳහන් වෙතත් ඈ දැරුවේ කවර ආකාරයේ තනතුරක් ද යන්න ගැන සඳහනක් නොවේ. අනතුර සිදුවන අවස්ථාවේදී යානය ධාවනය වෙමින් පැවැතියේ එක්සත් රාජධානියේ ලුටන් ගුවත්තොටුපොළ වෙතයි. එතැනින් තායිලන්තයට යන ගුවන් යානයකට ගොඩවීමට විචයි, නුර්සාරා සහ කවෙපොර්න් සැලසුම් කරගෙන සිටියහ.

විචායි ශ්‍රීවඩ්ඩනප්‍රභාගේ අභාවය සැලවීමත් සමඟම ශෝකය පළ කිරීම සඳහා විශාල පිරිසක් කින්ග් පවර් ක්‍රීඩාංගනය වෙත පැමිණියහ. විචායි වෙනුවෙන් තැන්පත් කෙරුණු මල්, පාපන්දු සමාජ ටී ෂර්ට් ආදිය විශාල වශයෙන් එහි දක්නට ලැබෙන බව සඳහන් වේ. විචායිගේ අභාවය නිසා පිරිසක් කණගාටුවට පත් වන බවත් මාධ්‍ය වාර්තා කරයි. එයට හේතුව විචායි පාපන්දු ක්‍රීඩකයන් අතර මෙන්ම පාපන්දු ක්‍රීඩා ලෝලීන් අතරත් ඉතා ඉහළ ජනප්‍රියත්වයක් හිමිකරගෙන සිටීමයි.

හැට හැවිරිදි විචායි ශ්‍රීවඩ්ඩනප්‍රභා සිව් දරු පියෙකි. “කින් පවර් ඉන්ටර්නැෂනල්” ව්‍යාපාරයෙහි නිර්මාතෘවරයා ද ඔහුය. ඔහු තායිලන්තයේ බිලියනපති ව්‍යාපාරිකයෙකි. විචායි තායිලන්තයේ සිටින පස් වැනි ධනවතා හැටියට ලෝක ප්‍රකට ෆොර්බස් සඟරාව වරක් නම් කර තිබිණ. විචායි, ලෙස්ටර් සිටි පාපන්දු සමාජය මිලදී ගත්තේ 2010 වසරේදීය. ඒ සඳහා ඔහු බ්‍රිතාන්‍ය පවුම් මිලියන 39කට ආසන්න මුදලක් වැය කළ බව සඳහන් වේ. ඔහුගේ හිමිකාරීත්වය යටතේ මේ ක්‍රීඩා සමාජය 2016 ප්‍රිමියර් ලීග් ජයග්‍රහණ අත්පත් කරගත්තේ ය. පසුගිය වසරේ පැවැති චැම්පියන් ලීග් තරගාවලියේ අවසන් වට අතරට පිවිසෙන්නටත් ලෙස්ටර් සිටි පාපන්දු සමාජය කණ්ඩායමට හැකි විණ.


හිජාබයෙන් මිදුනු පාසල් සිසුවියන් ඉරාන ආණ්ඩුවට මැදැඟිල්ල ඔසවයි.

ජපානයට ඉහළින් දියත්වන උතුරු කොරියානු මිසයිල

ස්වදේශික ඇමරිකානු ක්‍රියාකාරිකයෙකු වූ සචීන් ලිට්ල්ෆෙදර් මිය යයි.

ප්ලාස්ටික් හා ජපානය ?

පාකිස්ථානයේ මරණ රැල්ල ඇරඹෙයි ..

හයිටියේ මහජන සෞඛ්‍ය හදිසි අවස්ථාවක් ; මරණ සංඛ්‍යාව හත දක්වා ඉහළට

නේටෝ රටවල් නවයක ජනාධිපතිවරු යුක්රේනයට මිලිටරි ආධාර වැඩි වශයෙන් ලබා දෙන මෙන් නේටෝවෙන් ඉල්ලයි.

බ්‍රසීලයේ වම දකුණ පැටළේ

error: Content is protected !!
error: Content is protected !!