BORDERS MAY DIVIDE US, BUT HOPE WILL UNITE US.
මායිම් අප වෙන් කළ ද, බලාපොරොත්තුව අප එක්කරයි.

වමත්කරුවන් අඩවිය තවමත් අඳුරේ ය!

දරුවකු උපත ලබන්නට පළමුව එම දරුවාගේ වමත් හුරුව හෝ දකුණත් හුරුව හෝ තීරණය වන බව එම අධ්‍යනවල නියැලුණු පර්යේෂකයෝ පෙන්වා දුන්හ.

වමත හුරුවූවන් ගැන සමාජය තුළ පවතින්නේ එතරම් පැහැදිලි ආකල්පයක් නොවේ. සමහරුන්ගේ මතයේ හැටියට වමත් හුරුව අවලස්සන පමණක් නොව අප්‍රසන්න වූ ද දෙයකි. තවත් අය වමත්කරුවන්ව දුටුවේ විකෘතිකයන් පිරිසක් එහෙමත් නැත්නම් කොහෝ හෝ සිදු වූ වරදකට මැදිවුණු පිරිසක් හැටියට ය. මෙවැනි මත නිසා වමත හුරුවූවන් වෙත සමාජයේ බහුතරයකගෙන් එල්ල වූයේ දැඩි විමසුමකි. ඒ විමසුම, යට කී අන්දමෙන් ඍණාත්මක ආරෝපණයක් ලබා තිබීම වමත්කරුවන්ට එක් අතකින් එල්ලවුණු සියුම් පීඩනයක් ලෙස හඳුන්වා දෙන්නට පුළුවන. කෙනෙකුට වමත් හුරුවත් තවත් කෙනෙකුට දකුණත් හුරුවත් ඇති වන්නේ කෙසේද යන්න ගැන විද්‍යාඥයන් තුළ පවා අවධිවීමක් ඇති වුණේ වමත්කරුවන් ගැන සාමන්‍ය සමාජයේ පැවැති අවිද්‍යාත්මක නන් වැදෑරුම් මත නිසයි.

එක් දහස් නවසිය අනූව දශකයේ මුල භාගයේදී කැනඩා විද්වත්හු පිරිසක් වම හුරුවූවන් ගැන පර්යේෂණයක් පැවැත්වූහ. එම පර්යේෂකයන් කියා සිටියේ වයස අවුරුදු 40හිදී ගැබිණි තත්ත්වයට පත් කාන්තාවන් ලබන දරුවන් වමත්කරුවන් වන්නට සාපේක්ෂව වැඩි සම්භාවිතාවයක් පවතින බවකි. එවැනි ගැබිණියන් වමත් හුරු දරුවන් ලබන්නට ඇති සම්භාවිතාව, තරුණ වියේ පසුවන ගැබිණියක් වමත් හුරු දරුවන් ලබන්නට ඇති සම්භාවිතාව මෙන් දෙගුණයක් බැව් ඒ විද්වත්හු පෙන්වා දුන්නහ. එවැනි තත්ත්වය ඇති වන්නේ වයස අවුරුදු හතළිස් ගණන්වල පසුවන ගැහැණුන් දරු ප්‍රසූතියේදී ලබන ආතතිය වැඩි නිසා යැයි කියා අනුමාන කෙරිණ. ඒ බව තහවුරු කළ හැකි නිදසුන් කැනඩාවේ, බ්‍රිතාන්‍යයේ සහ ඕස්ට්‍රේලියාවේ මව්වරුන් ඇසුරෙන් සොයාගත හැකි බවත් එම පර්යේෂකයෝ කියා සිටියහ.

එක්දහස් නවසිය අසූ ගණන්වල සිට කෙරී ඇති අධ්‍යනවලින් කියැවෙන්නේ මතු කී පර්යේෂණයෙන් අනාවරණය කරගත් කාරණාවන්ට හාත්පසින්ම වෙනස් කාරණාවන් ය. දරුවකු උපත ලබන්නට පළමුව එම දරුවාගේ වමත් හුරුව හෝ දකුණත් හුරුව හෝ තීරණය වන බව එම අධ්‍යනවල නියැලුණු පර්යේෂකයෝ පෙන්වා දුන්හ. ඔවුන් මේ බව පැහැදිලි කළේ මව් කුස වැඩෙන දරුවන් අල්ට්‍රාසවුන්ඩ් පරීක්ෂණවලට ලක් කර ලබා ගත් තොරතුරු ඇසුරෙනි. එම පරීක්ෂණයන්ට ලක් කර තිබුණේ පිළිසිඳ ගැනීමකින් සති අටක් පමණ ඉක්ම ගිය කළලයි. දරුවා, මව් කුස ගෙවන 13 වන සතියේදී ඔහු හෝ ඇය හෝ තම වමතෙහි හෝ දකුණතෙහි හෝ මහපට ඇඟිල්ල උරන්න පටන් ගන්නා බව පර්යේෂකයෝ පවසති. මව් කුස වැඩෙන දැරුවා වම් මහපට ඇඟිල්ල උරන්නට තෝරා ගෙන ඇත්නම් ඔහු හෝ ඇය හෝ වමත්කරුවකු වන බැව් එම පර්යේෂණවලින් නිගමනය කෙරිණ. මව් කුස වැඩෙන දැරුවා දකුණු මහපට ඇඟිල්ල උරන්නට තෝරාගෙන ඇත්නම් ඔහු හෝ ඇය හෝ අනාගතයේදී දකුණත්කරුවකු වන බවත් එම අධ්‍යනවලින් කියැවුණේ ය.

දරුවාගේ ජාන මඟින් ඔහුගේ වමත් හෝ දකුණත් හෝ හුරුව තීරණය කෙරෙන්නේ යැයි පසු කාලයකදී මේ පිළිබඳ සොයා බැලීම් කළ විද්වත්හු පිරිසක් පැවසූහ. ඒ අනුව එය සිදුවන්නේ ජානමය වෙනස්කම් අනුව මොළයෙහි දකුණු අර්ධයේ හෝ වම් අර්ධයේ හෝ සිදුවන ක්‍රියාකාරීත්වය මතය. පසුගිය වසරේදී ඊලයින් ජර්නලයෙහි පළ වූ වාර්තාවකින් කියැවුණු කරුණු හේතුවෙන් මේ මතය තවදුරටත් සත්‍ය නොවන බැව් තහවුරු විණ. ඊලයින් වාර්තාවෙහි සඳහන් වන අන්දමට භ්‍රෑණයක මොළය සහ සුෂුම්නාව අතර ඇතිවන සම්බන්ධතාවයක් හේතුවෙන් දකුණත්භාවය හෝ වමත්භාවය හෝ කෙනෙකු තුළ පසු කලෙක පිහිටයි. කිසියම් කෙනෙකුගේ බාහු චලනයන්, ආරම්භ වන්නේ මොළයෙහි චාලක බාහිකය (Motor Cortex) නමැති ප්‍රදේශයෙනි. මේ ප්‍රදේශයෙන් සුෂුම්නාවට සංඥා නිකුත් වේ. බාහු සහ ගාත්‍රා ආදියෙහි චලනයන් ඇතිවන්නේ එම සංඥාවල අඩංගු පණිවුඩය පෙරළා ගැනීමෙන් අනතුරුවයි. පර්යේෂකයන් දක්වන ආකාරයට මවගේ ගර්භාෂයෙහි වැඩෙමින් පවතින සති පහළොවක් පමණ වයසැති භ්‍රෑණයක චාලක බාහිකය සහ සුෂුම්නාව අතර සම්බන්ධතාවයක් දැකිය නොහැකි ය. එසේ වුවත් එම භ්‍රෑණයෙන් ඇතිවන දරුවා වමත හුරු දරුවකු ද එසේත් නැත්නම් දකුණත හුරු දරුවකුද යන්න ඒ වනවිටත් තීරණය වී අවසන්ව ඇත. එහි අදහස අනෙකක් නොව, මොළය, දේහයෙහි පාලනය ආරම්භ කරන්නටත් පළමුව භ්‍රෑණයේ චලන පටන්ගෙන ඇති බවකි; එමෙන්ම හුරුව දකුණත් ද නැත්නම් වමත් ද යන්නත් නිශ්චය වී ඇති බවකි. 8 වන සතියේ සිට 12 වන සතිය දක්වා වූ කාලයේදී භ්‍රෑණයේ සුෂුම්නාව ආශ්‍රිත කොටසට ජානවලින් ඇති කෙරෙන බලපෑම කවක්ද යන්න පර්යේෂකයන් විශ්ලේෂණය කර ඇත. එහිදී ඔවුන්ට තහවුරු වී තිබෙන්නේ ගාත්‍රා සහ බාහු චලන පාලනය කරන සුෂුම්නා ඛණ්ඩයේ වම් සහ දකුණු පැති අතර පැහැදිලි වෙනසක් දැකිය හැකි බවකි. එනම්, එම ඛණ්ඩයේ අසමමිතික බවක් පවතින්නේය යන්නයි. එම අසමමිතික බව අපිජනකමය එකක් බවත් පර්යේෂකයන් තහවුරු කරගෙන ඇත. එනම්, ජාන ප්‍රකාශනයෙහි ඇතිවන වෙනස්කම්, ජීවියාට බලපාන අන්දමයි. එවැනි වෙනස්කම් ඇති වන්නේ පාරිසරික බලපෑම් මත බවත් ඒවා කළලයක වර්ධනයට බලපාන බවත් සඳහන් වේ. මෙකී ජාන ප්‍රකාශනයෙහි ඇතිවන වෙනස්කම්, සුෂුම්නාවේ වම් සහ දකුණු ඛණ්ඩවලට ඇති කරන්නේ එකිනෙකට වෙනස් බලපෑම්ය. එහි ප්‍රතිඵලයක් හැටියට වමත්කරුවන් හෝ දකුණත්කරුවන් හෝ ඇතිවන බව පර්යේෂකයෝ පෙන්වා දෙති.

කිසියම් සමාජයක අපට වැඩිපුර දැකිය හැකි වන්නේ දකුණතින් වැඩ කරන්නට හුරුවූවන් මිස වමතින් වැඩ කරන්නට හුරුවූවන් නොවේ. මේ තත්ත්වය පැහැදලි කර ගැනීම සඳහාත් විද්‍යාඥයෝ බොහෝ වෙහෙස වෙති. ඇමෙරිකා එක්සත් ජනපදයේ නෝර්ත්-වෙස්ටර්න් විශ්වවිද්‍යාලයේ විද්වත්හු පිරිසක් මේ සඳහා වරක් ගණිතමය ආකෘතියක් නිර්මාණය කළහ. මේ ආකෘතියෙන් උක්ත කාරණය පැහැදලි කෙරුණේ මානව පරිණාමය සමඟ බද්ධ වුණු කාරණයක් හැටියටය. සහයෝගිතාව සහ තරගය අතර සමතුලනයක් ඇතිවීම සඳහා එවැනි තත්ත්වයක් අවශ්‍ය බැව් එම ආකෘතිය වර්ධනය කළ විද්වත්හු කියා සිටියහ. වමත් හුරුව සහ දකුණත් හුරුව පසුපස ජානමය කාරණාවක් තිබිය හැකි වුවත් නියත වශයෙන්ම සමාජීයමය සාධකයක් නම් තිබෙන බව ඔවුන්ගේ මතය විණ. “සමාජමය සත්ත්වයකු වීම වැඩිවන විට සහයෝගිතාවට ඉතා ඉහළ අගයක් හිමි වේ; එවිට සාමාන්‍ය ජනගහනය එක් පසෙකට නැඹුරු වේ.” යනුවෙන් නෝර්ත්-වෙස්ටර්න් විශ්වවිද්‍යාලයේ සහය මහාචාර්ය ඩැනියෙල් ඒබ්‍රම්ස් පවසයි.

“… ඵලදායි සමාජයක් සඳහා වැදගත්ම සාධකය වන්නේ ඉතා ඉහළ පරිමාණයේ සහයෝගිතාවක්. … එහි ප්‍රතිඵලය වී තිබෙන්නේ මිනිසුන් තුළ දකුණත්කරුවන් බහුතරයක් හිඳීමයි. …”

සමහර මිනිසුන් දකුණත් හුරු අය වන්නටත් තවත් සමහර අය වමත් හුරු අය වන්නටත් හේතුව කුමක්ද යන්න විද්‍යාවෙන් විසඳා ගැනීම තවමත් අසීරු වී ඇත. එසේ වුවත් අපට අමතක කරන්නටම බැරි ප්‍රධාන කාරණයක් ඇත. එනම් ලෝක ජනගහනයේ 10%ක්ම වමත්කරුවන්ය යන්නය.

ඡායාරූප

http://www.iflscience.com/editors-blog/scientists-think-


නේටෝ රටවල් නවයක ජනාධිපතිවරු යුක්රේනයට මිලිටරි ආධාර වැඩි වශයෙන් ලබා දෙන මෙන් නේටෝවෙන් ඉල්ලයි.

බ්‍රසීලයේ වම දකුණ පැටළේ

ලෙබනන් හා ඊශ්‍රායල ගැටුමට ඇමරිකාව මැදිහත් වන ලකුණු

ඉම්රාන් ඛාන් අත්අඩංගුවට ගැනීමට වරෙන්තු

රුසියාවේ පාසලක වෙඩිතැබීමකින් 13දෙනෙකු මිය ගොස් 21 දෙනෙකු තුවාල ලබයි.

ඉතාලිය බෙනීටෝ මුසෝලිනිගෙන් පසු ජෝර්ජියා මෙලෝනිට

හිජාබයෙන් අවධි වුණු ඉරාණයේ රණ හඬ

ඉතාලියෙන් හමා එන ෆැසිස්ට්වාදයේ නව සුළඟ ජෝර්ජියා මෙලෝනි

error: Content is protected !!
error: Content is protected !!