ඊයේ පළමු වරට බ්‍රිතාන්‍යයේ කොවිඩ් මරණ 0 යි. කිරිබත් කන්න බෑ. තුන්වෙනි රැල්ල දැනටමත් පටන්ගෙන
ඊයේ (01) දින තුළ බ්‍රිතාන්‍යයේ පළමු වරට කොවිඩ් වසංගත තත්ත්වය මත කිසිදු පුද්ගලයකු මරණයට පත්ව නොමැති බව වාර්තා වේ.
මෙසේ කොවිඩ් මරණ සංඛ්‍යාව 0 ලෙස සටහන් වී තිබෙන්නේ එරට කොවිඩ් වසංගතය ආරම්භ වූවාට පසු පළමු වරට බව සඳහන් වේ.
ඊයේ දින ගතවූ පැය 24 තුළ කොවිඩ් ආසාදිතයින් 3165 දෙනෙකු වාර්තා වී තිබෙන අතර, එකදු මරණ සංඛ්‍යාවක් හෝ වාර්තා නොවී ඇති බවට ස්කයි නිව්ස් පුවත් සේවය වාර්තා කරයි.
බ්‍රිතාන්‍ය සෞඛ්‍ය ලේකම් මැට් හැන්කොක් මහතා අවධාරණය කර සිටියේ ඊයේ දින තුළ එකදු කොවිඩ් මරණයක් හෝ වාර්තා නොවීම සතුටුදායක පුවතක් වූවද වසංගතයේ සේයාව තවමත් නිම නොවී ඇති බවයි.
වසංගතය නිසා බ්‍රිතාන්‍යයේ පළමු වරට රට වසා දැමීමට පෙර, එනම් 2020 මාර්තු 7 වෙනි දින කාලසීමාවේදී, එරට තුළ කිසිදු මරණයක් වාර්තා වී නොතිබුණු අතර, ඉන්පසු මරණ වාර්තා වීම ආරම්භ විය.
මේ දක්වා බ්‍රිතාන්‍යය තුළ වාර්තා වී ඇති කොවිඩ් මරණ සංඛ්‍යාව 127,782 බව සඳහන් වේ. සමස්ත ආසාදිතයින් සංඛ්‍යාව මිලියන 4 ඉක්මවා (4,490,438) තිබේ.
මේ වන විට බ්‍රිතාන්‍යයේ පුද්ගලයින් 39,477,158 දෙනෙකු කොවිඩ් වෛරසයට එරෙහි එන්නත් පළමු මාත්‍රාව ලබා ගෙන තිබේ.
එමෙන්ම දෙවන මාත්‍රාව ද සහිතව පුද්ගලයින් 25,734,719 දෙනෙකු සම්පූර්ණයෙන් එන්නත්කරණයට ලක්ව තිබේ.
මේ වන විට එංගලන්තයේ වයස අවුරුදු 30 ඉක්මවූ පුද්ගලයින්ට පමණක් තම පළමු මාත්‍රාව ලබා ගැනීම සඳහා ලියාපදිංචි වන ලෙස ඉල්ලා තිබේ. ඒ තුළ දහස් සංඛ්‍යාත ජනයා එන්නත් ලබා ගැනීම සඳහා නිරිතදිග ලන්ඩනයේ පෝලිම් ගැසී සිටිනු දක්නට හැකිය.
නවතම වාර්තා අනුව, බ්‍රිතාන්‍යය තුළ තෙවන කොවිඩ් රැල්ලක සේයාවන් දැනටමත් මතුවී තිබේ. මෙම තත්ත්වය තුළ සෞඛ්‍ය ආරක්ෂිත විධිවිධාන වලට අනුකූලව දිගටම කටයුතු කළ යුතු බවත් මෙම මස අවසානයේ එංගලන්තයේ ලිහිල් කිරීමට නියමිත සංචරණ සීමා තවදුරටත් පවත්වා ගත යුතු බවත් විද්‍යාඥයින් පෙන්වා දී තිබේ.
කොවිඩ් වෛරසයේ නව ප්‍රභේද හටගැනීම තුළ දැනට ක්‍රියාත්මක වන එන්නත් වැඩපිළිවෙල කොපමණ දුරට සාර්ථක ද යන්න සොයා බැලිය යුතු බවට ඔවුහු අවධාරණය කරති.
