සටහන – රෂිකා හෙන්නායක
කොළඹ (LNW): ඩෙරා ඉස්මයිල් ඛාන් නගරයේ පොලිස් මුර සංචාරයක් ඉලක්ක කර ගනිමින්, වයඹ දිග පාකිස්තානයේ බෝම්බ පිපිරීමකින් පුද්ගලයන් 05 දෙනෙකු ජීවිතක්ෂයට පත්ව 21 දෙනෙකු තුවාල ලබා ඇති බව එරට පොලිස් නිලධාරීන් මාධ්‍යට වාර්තා කරයි.
ඩෙරා ඉස්මයිල් ඛාන් නගරය යනු, දිගු කලක් තිස්සේ විදේශීය සහ දේශීය සන්නද්ධ කණ්ඩායම්වලට නිවහනක් වූ නගරයක් බව සඳහන් වන අතර ,මෙම සිද්ධිය මරාගෙන මැරෙන ප්‍රහාරයකින් සිදු වූවක් ද , නැති නම් ඒ අසල අටවා තිබූ බෝම්බයකින් සිදු වූවක් ද යන්න, තවම පැහැදිලි නැති බව පාකිස්තානු පොලීසිය අවධාරණය කර ඇත.
මෙම වසර තුළ පාකිස්තානයේ ප්‍රචණ්ඩත්වය ඉහළ ගොස් ඇති අතර, ඊට මූලික වශයෙන් ඇෆ්ගන් තලේබාන් සංවිධානය සමඟ මතවාදී ව පෙළ ගැසී ඇති තහනම් කණ්ඩායමක් වන Tehreek-e-Taliban Pakistan (TTP)හි ක්‍රියාකාරකම් හේතු වී ඇති බව වාර්තා වෙයි.
තවද, පාකිස්තානයේ මියන්වාලිහි පිහිටි පාකිස්තාන පුහුණු ගුවන් හමුදා කඳවුරට මරාගෙන මැරෙන බෝම්බ ප්‍රහාරයක්ද එල්ල වී ඇති අතර, මෙම ප්‍රහාරයෙන් මරාගෙන මැරෙන බෝම්බකරුවන් තිදෙනෙකු මිය ගිය බවද පාකිස්තාන හමුදාව වාර්තා කරයි.
තවදුරටත් පාකිස්තාන හමුදාව සඳහන් කරන්නේ ඒ අතරින් තවත් තිදෙනෙකු කොටු කර ගැනීමට සමත් වූ බවයි.
