සටහන – නිපුනි ලියනගේ
ලෝකය (අවුට්බවුන්ඩ් ටුඩේ): ඉතාලි විලාසිතා නිර්මාණ ශිල්පී Davide Renne තම ජීවිත ගමන නිම කරමින් මිය ගොස් ඇති බව විදෙස් මාධ්‍ය වාර්තා කරයි.
Renne උපත ලැබුවේ 1977 ජූලි මාසයේදී ටස්කනි හි ෆොලෝනිකා හි ය. මියයන විට අවුරුදු 46 පසුකළ ඔහු Moschino හි නිර්මාණ අධ්‍යක්ෂවරයා වී දින නවයක් ගෙවී ගොස් පමණි.
මරණයට හේතුව නිශ්චිත නොවනමුත් Moschino ගේ මව් සමාගම Aeffe “හදිසි අසනීපයක්” ගැන සඳහන් කර ඔහු මිලානෝහිදී සිකුරාදා දින මිය ගිය බව පැවසීය.
Renne මීට පෙර Gucci හි කාන්තා ඇඳුම් ප්‍රධානියා වූ අතර එහිදී ඔහු වසර 20කට ආසන්න කාලයක් සේවය කළේය.
ෆ්ලෝරන්ස් විශ්ව විද්‍යාලයේ සහ පොලිමෝඩා විලාසිතා පාසලේ අධ්‍යාපනය ලැබූ Renne 2004 හි Gucci වෙත යාමට පෙර ඉතාලි විලාසිතා නිර්මාණකරුවෙකු සහ උපදේශකයෙකු වන Alessandro Dell’Acqua සමඟ වැඩ කරමින් ඔහුගේ වෘත්තීය ජීවිතය ආරම්භ කළේය.
Moschino ගේ නිර්මාණ අධ්‍යක්ෂක ලෙස Renne පත් කිරීම ඔක්තෝම්බර් මාසයේදී ප්‍රකාශයට පත් කරන ලද අතර, ඔහු පෙබරවාරි මාසයේ Milan Fashion Week හිදී Moschino වෙනුවෙන් ඔහුගේ පළමු එකතුව එළිදැක්වීමට නියමිතව තිබුණි.
