ගුවන් හමුදා නිළධාරිනියකගේ හිස මත පැළදි “මිස් ඇමෙරිකා – 2024” කිරුළ!

සටහන – නිපුනි ලියනගේ

ජනවාරි 16, ලෝකය (අවුට්බවුන්ඩ් ටුඩේ): එක්සත් ජනපද ගුවන් හමුදාවේ දෙවන ලුතිනන් සහ හාවඩ් කෙනඩි පාසලේ රාජ්‍ය ප්‍රතිපත්ති වැඩසටහනේ මාස්ටර් ශිෂ්‍යයෙකු වන 22 හැවිරිදි “මැඩිසන් මාෂ් (Madison Marsh)” ඉකුත් ඉරිදා රාත්‍රියේ ෆ්ලොරිඩාවේ ඔර්ලන්ඩෝ හි පැවති “2024 මිස් ඇමෙරිකා” තරඟයෙන් ජයග්‍රහණය කිරීමට සමත් වූ සුරූපිණිය විය.

කොලරාඩෝ ප්‍රාන්තය නියෝජනය කළ ඇය, මෙම ජයග්‍රහණය ලැබූ පළමු ක්‍රියාකාරී රාජකාරි ගුවන් හමුදා නිලධාරිනිය ද වේ.

මිස් ඇමරිකා තරඟයේ ටෙක්සාස් හි Ellie Breaux පළමු අනුශූරතාව හිමිකර ගැනීමට සමත් විය.

එක්සත් ජනපදයේ ප්‍රාන්ත 50ම මෙන්ම කොලොම්බියා දිස්ත්‍රික්කයද නියෝජනය කරමින් තරඟකරුවන් පනස් එක් දෙනෙකු මෙම අවස්ථාවට සහභාගී විය.

අවසන් පූර්ව තරගකරුවන් 11 දෙනෙකුට සීමා කරන ලද අතර 10ක් මූලික විනිශ්චයකරුවන් විසින් තෝරා ගන්නා ලදී. එක්සත් ජනපදය පුරා සිටින රසිකයින් සහ අනුගාමිකයින් සඳහා විවෘත මහජන ඡන්දයකින් පසු අවසන් ජයග්‍රාහිකාව තෝරා ගන්නා ලදී.