පාකිස්ථානයේ නව අගමැති ලෙස දිවුරුම් දුන් ඉම්රාන් ඛාන් (Imran Khan), ජාතිය අමතා සිය මංගල කතාව පැවැත්වීය. ඉරිදා (19) පාකිස්ථාන වේලාවෙන් රාත්රී 9.30ට රූපවාහිනිය ඔස්සේ විකාශය වූ එය, ඉම්රාන් ඛාන්ගේ පාකිස්ථානය පිළිබඳ අනාගත සැලසුම් හෙළි කර සිටියි.
විචාරකයන්ට අනුව, මෙය ආසියාවේ දේශපාලන නායකයෙකු, ‘පොඩි මිනිසා‘ වෙනුවෙන් මේ තාක් කාලයකට ඉදිරිපත් කර ඇති හොඳම සැලසුම වේ.
පුරා වසර 22ක දේශපාලන අරගලය තුළ තමන් සමග නොසැළී නැගී සිටි මිනිසුන් වෙත ඔහු සිය කතාවේදී මුලින්ම ස්තූතිය පුද කළේය. තමන් දේශපාලනයට පිවිසියේ රැකියාවක් හෝ වෘත්තියක් වශයෙන් නොව පාකිස්ථානයේ පියා වන මොහොමඩ් අලි ජින්නා සහ අලාමා මොහොමඩ් ඉක්බාල් යන අයගේ දැක්ම අනුව පාකිස්ථානයට උදව් කිරීමට බව ද ඉම්රාන් ඛාන් කියා සිටියේය.
පාකිස්ථානය මුහුණ දී සිටින ණය අර්බුදය අගමැති ඉම්රාන් ඛාන්ගේ විශේෂ සැලකිල්ලට ලක් විය. ‘‘ඉතිහාසයේ පෙර නොවූ විරූ පරිදි පාකිස්ථානය දැන් ආර්ථික දුෂ්කරතාවලට මුහුණ පා සිටිනවා“ යැයි ඔහු පැවසුවේය. ‘‘අපේ ණය බර මේ වන විට ට්රිලියන 28 ක්. ගතවූ දස වසර තරම් ඉතිහාසයේ කිසිම දිනෙක අප මෙතරම් ණය වී නැහැ.“
‘‘පොලිය ගෙවීම සඳහාත් ණය ගැනීමට සිදුව තිබෙනවා“ යැයි ද ඉම්රාන් ඛාන් එහිදී අවධාරණය කළේය.
පාකිස්ථානයේ මානව සංවර්ධනය පිළිබඳ ජගත් සංවිධානයේ වාර්තාව ද අගමැති ඉම්රාන් ඛාන් උපුටා දැක්වීය. ‘‘අප අවසානාවන්ත පරිදි ලෝකයේ ළදරු මරණ ඉහළම රටවල් 5 අතරින් එකක්. එයට හේතුව වී තිබෙන්නේ අපට පිරිසිදු ජලය ලබාගත හැකි ක්රම නොමැති වීමයි. ඒ වගේම ගර්භනී කාන්තාවන් අතර ඉහළම මාතෘ මරණ අනුපාතිකය වාර්තා වන්නේත් පාකිස්ථානයෙන් යැයි ඉම්රාන් ඛාන් පැවසුවේය.
අගමැති ඉම්රාන් ඛාන් පැවසුවේ, තමන් වසර ගණනාවක් මුළුල්ලේ දරුවන්ගේ මන්ද පෝෂණය පිළිබඳ කතා කළත් කිසිවෙකු එය බරපතළ අන්දමින් සැලකිල්ලට නොගත් බවයි. ‘‘අපි කතා කරන්නෙ මේ රටේ දරුවන්ගෙන් 45%ක ප්රතිශතයක් ගැන. ඔවුන්ට නිසි පෝෂණයක් නැහැ. ඔවුන් නිසි ලෙස සංවර්ධනය වන්නේ නැහැ..“
‘‘මේ රටේ දුප්පතුන් සහ පොහොසතුන් ජීවත් වන්නේ කොහොමද කියා මට කතා කරන්න උවමනායි.‘‘ ඔහු පැවසුවේය. ‘‘අගමැතිට සේවකයො 524 යි, කාර් 80 යි. අගමැතිට වෙඩි නොවදින කාර් 33 කුත් තියෙනවා. අගමැතිට ඇමරිකාවට යන්න හෙලිකොප්ටරයි ගුවන් යානායි තිබෙනවා. අපිට අති දැවැන්ත බංගලා තියෙනවා. හැම සැප පහසුකමක්ම තිබෙන.
‘‘එක පැත්තකින් අපිට අපේ මිනිස්සු වෙනුවෙන් වියදම් කරන්න සල්ලි නැහැ. අනෙක් පැත්තෙන්, අපේ යටත්විජිත ස්වාමියො වගේ ජීවත් වෙන්න හුරු වෙලා ඉන්න පිරිසක් අපිට ඉන්නවා.“ ඔහු පැසුවේය. එනිසා ධනවතුන් සහ වරප්රසාද ලාභීන් සිය වගකීම් ගැන නැවත තක්සේරුවක යෙදිය යුතු බව ඉම්රාන් ඛාන් පැවසුවේය. ‘‘දිනකට දෙවතාවක් කෑම කන්න බැරි අය ගැනත් හිතන්න අපි පුරුදු වෙන්න ඕනෙ. මිලියන 25 ක දරුවන් පාසලෙන් අස් වුණාට පස්සෙ මොකද කරන්නෙ කියල අපි අහන්න ඕනෙ. අපේ ජනගහනයට මොකද වෙන්නෙ කියල අපි අහන්න ඕනෙ. දේශගුණික වෙනස්කම් ගැන අපි අවධානය යොමු කරන්න ඕනෙ.“
අගමැති ඉම්රාන් ඛාන් ප්රධාන කරුණු 5 කින් සමන්විත න්යාය පත්රයක් රටට මේ සමගම හඳුන්වා දුන්නේය.
මේ ඉලක්කවලට යාම සඳහා සිය ක්රියා පිළිවෙත ද ඔහු හෙළිදරව් කළේය.
‘‘අග්රමාත්ය කාර්ය මණ්ඩලයේ 524 දෙනාගෙන් මම තබාගන්නේ 2 ක් පමණයි. හමුදා ලේකම්ගේ නිවාසය විදිහට පැවති මහල් තුනේ නිවසේ මා නතර වනවා. මගේ ජීවිතය අනතුරේ යැයි බුද්ධි අංශ පවසන නිසා මම මෝටර් රථ දෙකක් තබාගන්නවා.
‘‘අපි සියලුම වෙඩි නොවදින කාර් වෙන්දේසි කරනවා“ යැයි ඉම්රාන් ඛාන් ප්රතිඥා දුන්නේය. ‘‘ඒවා පැමිණ මිලදී ගන්න කියා මම ව්යාපාරිකයන්ට ආරාධනා කරනවා. ඒවා විකිණීමෙන් ලැබෙන මුදල් අපි රාජ්ය භාණ්ඩාගාරයේ තැන්පත් කරනවා.“
‘‘සියලුම ආණ්ඩුකාර නිවාස හැකි කාත් සරල ලෙස තබාගන්නට මම උත්සාහ කරනවා.“ යැයි ද ඔහු පැවසුවේය.
ඉම්රාන් ඛාන් සැලසුම් කරන්නේ අගමැති නිවස විශ්ව විද්යාලයක් බවට පත් කරන්නට ය. එය එවැන්නක් සඳහා කදිම ස්ථානයක් බව ඔහු කීවේය.
රට පුරා වියදම් කපා හැරීමේ ක්රම සොයාබැලීම සඳහා විශේෂ කමිටුවක් ද ඔහු විසින් පත් කිරීමට නියමිත ය.
ඉම්රාන් ඛාන් දිගින් දිගටම අවධාරණය කළේ දුප්පතුන් ව ධනවතුන් විසින් රැක බලා ගත යුතුය යන කාරණයයි. කුඩා සහ මධ්යම පරිමාණ ව්යාපාර රටේ ආර්ථිකයේ කොඳු නාරටිය බව කී ඔහු, පිටරට තිබෙන පාකිස්ථාන මුදල් නැවත සිය රට ගෙන්වා ගැනීම සඳහාම කැපවුණු අගමැති ලේකම්වරයෙක් පත් කරන බව ද පැවසුවේය.
මීළගට අධිකරණ පද්ධතිය වෙත සිය අවධානය යොමු වන බව ඉම්රාන් ඛාන් පැවසීය. ගොඩ ගැසී ඇති දැවැන්ත නඩු තොගය සම්බන්ධයෙන් කළ යුතු දේ අගවිනිසුරුවරයා සමග සාකච්ඡා කරන බව පැවසූ ඔහු, නඩුවක් වසරක කාලයකින් අසා නිම කිරීම වෙත සිය අවධානය යොමු වන බව පැවසීය.
ඉම්රාන් ඛාන්ගේ මැතිවරණ පොරොන්දුවල ප්රබලතම සාධකයක් වූයේ කාන්තාවන් සවිබල ගැන්වීම ය. ඔහු දේපළ ආරාවුල් සම්බන්ධයෙන් සිය උපකාරය පතා පැමිණි වැන්දඹුන් පිළිබඳ මෙම සමාරම්භක කතාවේදී ද වැඩි සැලකිල්ලක් ලබාදුන්නේ මෙසේ ය. ‘‘අගවිනිසුරුවරයාගෙන් මට විශේෂ ඉල්ලීමක් කරන්නට අවශ්යයි. මගේ උදව් පතා පැමිණි කාන්තාවන් කිහිප දෙනෙක් සිටිනවා. ඔවුන් දේපළ ආරාවුල් වලින් හොඳටම අසරණ වෙලා. අගවිනිසුරුතුමාගෙන් මම ඉල්ලීමක් කරනවා. අඩුම ගණනේ වැන්දඹුවන් සම්බන්ධයෙන්වත් මෙවැනි නඩු හැකි ඉක්මනින් අවසන් කර දෙන්න.“
තරුණයන් ට රැකියා දිය යුතු බවත්, විශාල නිවාස ව්යාපෘතියක් ඔවුන් වෙනුවෙන් ආරම්භ කරන බවත් ඉම්රාන් ඛාන් පැවසුවේය. එසේම පොලී රහිත ණය ලබාදීම මගින් තරුණයන් ව්යවසායකයන් බවට පත් කිරීමට ද ඉම්රාන් ඛාන් සැලසුම් කරයි.
යම් හෙයකින් ඉම්රාන් ඛාන් මේ දේවල් සාර්ථක ලෙස ක්රියාවට නැංවීමට සමත් වුවහොත්, ආසියාවේ මීළඟ ආශ්චර්යය බවට පත්වනු ඇත්තේ පාකිස්ථානයයි.