තම පියාගේ සුව දුක් බැලීමට ආ හැරී කුමරු!
විනාඩි 30 ක පමණ කාලයක් ඔවුන් දෙදෙනා සුහද කථා බහක නිරතව සිට ඇති බව විදෙස් මාධ්‍ය පවසයි.
සටහන – රෂිකා හෙන්නායක
පෙබරවාරි, 08 ලෝකය (අවුට්බවුන්ඩ් ටුඩේ): එංගලන්තයේ තුන්වැනි චාල්ස් රජු මේවන විට පිළිකාවක් සඳහා ප්‍රතිකාර ලබමින් සිටින අතර , ඔහුගේ සුවදුක් විමසීම සඳහා ඇමරිකාවේ සිට පැමිණි බාල පුත් හැරී කුමරු ක්ලැරන්ස් මාලිගයේදී මුණගැසී ඇති බව එංගලන්ත මාධ්‍ය පවසයි.
පසුගිය කාලයේ රජ පවුලෙන් වෙන්ව ඇමරිකා එක්සත් ජනපදයේ කැලිෆෝනියා ප්‍රාන්තයේ වාසය කරන හැරී කුමරු සිය පියා වන චාල්ස් රජු පිළිකාවකින් පෙළෙන බව අනාවරණය වීමත් සමගම සිය රාජකාරි කටයුතු අත්හිටුවා වහා එංගලන්තයට පැමිණි අතර විනාඩි 30 ක පමණ කාලයක් ඔවුන් දෙදෙනා සුහද කථා බහක නිරතව සිට ඇති බව විදෙස් මාධ්‍ය පවසයි.
මෙම අවස්ථාවට චාල්ස් රජුගේ බිරිය වන කැමිලා බිසව ද සහභාගි වී ඇති අතර විනාඩි 30 ක කාලයක් හැරී කුමරු සමග කථාබස් කිරීමෙන් අනතුරුව ක්ලැරන්ස් මාලිගයේ සිට හෙළිකොප්ටර් යානයකින් චාල්ස් රජු හා කැමිලා බිසව ඔවුන් මෙම දිනවල රැඳී සිටින සැන්ඩි්‍රන්ගම් ප්‍රදේශයේ පිහිටි නිවස වෙත ගොස් තිබේ.
සැන්ඩි්‍රන්ගම් නිවසෙහි විවේකී සුවයෙන් කල් ගෙවන චාල්ස් රජු එහිදී පිළිකා ප්‍රතිකාර ලබමින් සිටි. හැරී කුමරු සිය පියා හමුවීමෙන් පසු මධ්‍යම ලන්ඩනයේ පිහිටි හෝටලයක් වෙත නවාතැන් ගැනීම සඳහා ගොස් තිබේ. ඔහුගේ බිරිය වන මේගන් මර්කල් මෙම ගමන සඳහා එක් වී නොමැති බවද වාර්තා වේ.
