සටහන – රෂිකා හෙන්නායක
ලෝකය (අවුට්බවුන්ඩ් ටුඩේ): චීන ජනාධිපති ෂී ජින් පිං ඇමරිකාවේ සංචාරයකට එක්ව තිබේ. ඒ මහතා එරට වේලාවෙන් 14 වැනි දා සවස, විශේෂ ගුවන් යානයකින් ඇමරිකාවේ සැන් ප්‍රැන්සිස්කෝ ගුවන් තොටුපළට ළඟා වී ඇත. ඒ ඇමරිකානු ජනාධිපති ජෝ බයිඩන් ගේ ඇරයුමකට අනුව බවයි වාර්තා වන්නේ.
චීන ජනාධිපතිවරයා අඟහරුවාදා එක්සත් ජනපදයට පැමිණියේ වසර හයකට පසුව බවයි එරට මාධ්‍ය සඳහන් කරන්නේ.
ඇමරිකානු ජ්‍යෙෂ්ඨ නිලධාරීහු පිරිසක් සැන් ප්‍රැන්සිස්කෝ ගුවන් තොටුපළට පැමිණ චීන ජනපති මහත් හරසරින් පිළිගෙන ඇති අතර, කැලිෆෝනියා හි ආණ්ඩුකාර ගැවින් නිව්සම්, ඇමරිකානු භාණ්ඩාගාර ලේකම් ජැනට් එල් යෙලන් සහ චීනයේ ඇමරිකානු තානාපති ආර්. නිකොලාස් බර්න්ස් යන මහත්ම මහත්මීහු ද එහි පැමිණි බව සඳහන් වන වේ. තවද චීන ජනපති පිළිගැනීම සඳහා ඇමරිකාවේ චීන තානාපති ෂිය් ෆෙංග් මහතා ද පැමිණ සිටි බව වාර්තා වේ.
ෂී ජින් පිං ජනාධිපතිවරයා සැන් ප්‍රැන්සිස්කෝ නුවර ගුවන් තොටුපළේ සිට හෝටලයට පැමිණෙන මග දෙපස, එරට වෙසෙන චීන ජාතිකයෝ සහ ඇමරිකාවේ ඉගෙනුම ලබන චීන සිසුහු පෙළ ගැසී සිටියහ. ඔවුහු චීන හා ඇමරිකානු ජාතික ධජ ලෙලවමින් ෂී ජින් පිං ජනාධිපතිවරයා උණුසුම් ලෙස පිළිගත් බවයි එරට මාධ්‍ය වාර්තා කරන්නේ.
සැන් ප්‍රැන්සිස්කෝ හීදී ඇමරිකාන් ජනාධිපති සහ චීන ජනාධිපති ද්විපාර්ශ්වීය රාජ්‍ය නායක හමුවකට එක්වීමට නියමිත අතර, ඇමරිකාවේ පැවැත්වෙන Asia-Pacific Economic Cooperation (APEC) සංවිධාන නායකයන්ගේ 30 වැනි නිල නොවන සමුළුවට ද චීන ජනාධිපතිවරයා එක්වීමට නියමිත බව්ද සඳහන් වේ.
