ඇමරිකාව චීනයට විරුද්ධව නඩු පැවරීම අරඹයි

මේ අනුව මිසූරි ජනපදයේ නීතිපතිවරයා වන මිසූරි නීතිපති එරික් ෂ්මිට් විසින් චීනයට විරුද්ධව පළමු නඩුව පවරා තිබේ.

තොරතුරු වසංකිරීම, රහසිගත තොරතුරු ලබාදෙන්නන් (විෂ්ල් බ්ලෝවර්ස්) මර්දනය කිරීම සහ වසංගතය පැතිරීම වැළැක්වීමට ප්‍රමාණවත් දේවල් නොකිරීම එම චෝදනා පත්‍රයට ඇතුළත් වේ.

මෙම පළමු නඩුවෙන් අවධානය යොමු කරන්නේ මිසූරි ජනදයට වසංගතයෙන් වූ හානිය පිළිබඳව ය. මිසූරි හි 6105 දෙනෙකු රෝගයට ගොදුරු වී ඇති අතර, 229 දෙනෙක් මේ දක්වා මිය ගොස් තිබේ.

චීනය මෙවැනි නඩුකර සම්බන්ධයෙන් ස්වාධිපත්‍ය මුක්තියක් (sovereign immunity) දරන බව සාමාන්‍ය පිළිගැනීමයි. එනම් විදේශවලදී චීන ආණ්ඩුවට එරෙහිව පවරන නඩුවලින් මුක්තියක් ඔවුන්ට හිමි ය. නමුත් ඒ මුක්තිය හිමිවීමේ සීමාවන් සහ එය ව්‍යාතිරේඛී වන අවස්ථා මෙහිදී අධිකරණය විසින් දීර්ඝ වශයෙන් සලකා බැලීමට නියමිත ය.

මෙම නඩුවේ චෝදනා පත්‍රෙයන් කියැවෙන තවත් වැදගත් කාරණාවක් වන්නේ, චීන සෞඛ්‍ය බලධාරීන් මෙම වසංගතය මිනිසාගෙන් මිනිසාට බෝ වන බව සනාථ වී තිබියදීත්, ලෝක සෞඛ්‍ය සංවිධානයට ඔවුන් ඒ බව මූලික අදියරේදී වසං කළ බවයි. ඒ අනුව වුහාන් පළාතෙන් දහස් ගණන් ජනයා පිටවීම සහ ඇතුල් වීම සිදුව තිබේ. ජනවාරි 16 වැනිදා පවා වුහාන් හි නායකයන් විසින් 40,000 ක පිරිසකට භෝජන සංග්‍රහයක් පවත්වා තිබේ.

මෙම වසංගතය පිළිබඳ මුල් වරට තොරතුරු හෙළිකළ වුහාන් හි වෛද්‍ය ලී වෙන්ලියැන්ග් ඇතුළු පිරිසක් සංවිධානාත්මක ලෙස පොලිස් මර්දනයට නතු කළ ආකාරය ද මෙහිදී සැලකිල්ලට ගෙන ඇත.

‘‘වසංගතයට පෙර මිසූරි ජනපදයේ විරැකියා ප්‍රතිශතය අවම මට්ටමක තිබුණා. නමුත් මේ වන විට එය මහා උද්ධමනයෙන් පසු උපරිම මට්ටමට ළඟා වී තිබෙනවා..‘‘ යැයි ද සිය ජනපදයට වූ හානිය ස්ථාපිත කරමින් නීති විශාරදයෝ ප්‍රකාශ කරති.

ඉදිරියේදී ඇමරිකාවේ සෙසු ජනපද මෙන්ම රටවල් ගණනාවක් ද චීනයට එරෙහිව නීති මාර්ගයට පිවිසීමට නියමිත ය.

ප්‍රධාන ඡායාරූපය – Eric Schmitt, Missouri attorney general, speaks during a news conference outside the Supreme Court in Washington, DC, on September 9, 2019.