ඉතා අලංකාර ලෙස රූගත කර ක්‍රමයෙන් දිග හැරෙන සෑම The Crown හී සෑම කථාංගයක්ම ඔස්සේ ම බ්‍රිතාන්‍ය අධිරාජ්‍යයෙකු පිළිබදව සාමාන්‍ය මිහිසෙකුට ඇති දැක්ම ටිකෙන් ටික වෙනස් කරරවාලයි. තරුණ එලිසබෙත් කුමරිය සහ මිය යන ජෝර්ජ් රජු අතර පෞද්ගලික අවස්ථා, එලිසබෙත්ගේ කැරලිකාර සහෝදරිය වන මාග්‍රට් සමඟ ඇති සම්බන්ධතාවය, පිලිප් කුමරු සිය නාවික වෘත්තිය අතහැර දැමීම හේතුවෙන් ඇති කරගන්නා නිරන්තර අසතුටට එලිසබෙත් කුමරිය ඉවසීමෙන් දරාසිටීම, මෙන්ම ලෝකයේ සියලු ධනය, බලය හා තත්වය තමන් සතුව ඇති නමුත් ඒ සියල්ල මධ්‍යයේ, තමාට එල්ල වන මානසික ප්‍රහාර තනිවම විද දරාගෙන සිටින තරුණියකගේ අභ්‍යන්තර කැලඹීම් හා වෙනස්කම් ඉතාම අපූර්ව ලෙස ඉදිරි කථාංග ඔස්සේ විදහා දක්වා ඇත.
හයවන ජෝර්ජ් රජු සැන්ඩ්‍රින්හැම්හි රාජකීය නිවසේ ඔහුගේ ඇඳේ මියගොස් සිටියදී සොයාගනු ලබයි. මුළු රටම කම්පනයට පත්ව ඇත, මන්ද ඔහුගේ වෛද්‍යවරු පවා අවසානය ළං වී ඇතැයි නොසිතූ බැවිනි. රජු මියයන විට එලිසබෙත් කුමරිය කෙන්යාවේ සංචාරය කරමින් සිටියි. එලිසබෙත් හා පිලිප් සිය සංචාරය අතරමඟ නවතා සිය පියාගේ අවමංගල්‍ය උත්සවය වෙනුවෙන් නැවතත් ලන්ඩනයට පැමිණෙයි. 57 වන වියේදී මිය යන හයවන ජෝර්ජ් රජු මහා බ්‍රිතාන්‍යයේ එකමුතුව හා අඛණ්ඩතාවයේ සංකේතයක් විය.
හයවන ජෝර්ජ් රජුගේ අවමංගල්‍ය උත්සවය සඳහා රාජකීය පවුලේ සාමාජිකයන් සියල්ල ලන්ඩනයට එක් වෙති. මෙහිදී රජුගේ සොයුරා වන අටවන එඩ්වඩ් රජු ලෙස ඉල්ලා අස් වූ වින්ඩ්සර් ආදිපාදවරයාද අවමංගල්‍ය උත්සවයට එක් වෙයි. අවමංගල්‍ය උත්සවයෙන් පසු එලිසබෙත් රැජින ඇගේ සිහසුනට පත් වීමේ උළෙල සැලසුම් කිරීමට පටන් ගත්තද, චර්චිල් එය 1953 ජුනි දක්වා තල්ලු කරන ලෙස ඉල්ලා සිටී. ඊට ප්‍රතිචාර වශයෙන් ඇය එවකට 78 හැවිරිදි වියේ පසුවූ අග්‍රාමාත්‍යවරයාගෙන් ඉල්ලා සිටින්නේ තම සහකරුගේ නමට පසුව තම දරුවන්ට මවුන්ට්බැටන්-වින්ඩ්සර් යන නම තැබීමට කැබිනට් මණ්ඩලයට ඒත්තු ගැන්වීමට උදව් කරන ලෙසයි. නමුත් කැබිනට් මණ්ඩලය එය ප්‍රතික්ෂේප කරන අතර, ඇගේ උරුමක්කාරයන් සහ ඔවුන්ගෙන් පැවත එන්නන් සඳහා වින්ඩ්සර් යන නම පවත්වා ගැනීමට ඇයට බල කෙරෙයි. තම පවුලේ අයට ක්ලැරන්ස් හවුස් හි රැඳී සිටීමට අවස්ථාව ලබාදෙන ලෙස ඇය ඉල්ලා සිටියද අවසානයේදී ඔවුන් සමඟ බකිංහැම් මාලිගයට යාමට එකඟ වේ.
ජනගහනයට හානිකර විය හැකි ඝන මීදුම තට්ටුවක් පිළිබඳව කාලගුණ අනතුරු ඇඟවීම් කැබිනට් මණ්ඩලයට නිකුත් කෙරේ. නමුත් චර්චිල් මෙම මීදුම් තත්වය ප්‍රශ්නයක් ලෙස දැකීම ප්‍රතික්ෂේප කරයි. එය ඉතා බියකරු තත්වයක් බවට හැරීමට පටන්ගන්නා අතර මිනිසුන්ද ඒ හේතුවෙන් මියයන්නට පටන් ගනියි. සිය ගනනක් ජනයා මිය යද්දී, අගමැතිට ඉල්ලා අස්වන ලෙස ඉල්ලා සිටීමට රැජිනට බල කෙරෙයි. නමුත් එසේ ඉවත් කිරීමට මත්තෙන් මෙම මීදුම් තත්වය ක්ෂය වී යන්නේ චර්චිල්ට වාසිසහගත ලෙසය.
එලිසබෙත්ගේ මිත්තණිය වන මේරි රැජින මිය යයි. වින්ඩ්සර් ආදිපාදවරයා නැවත ලන්ඩනයට පැමිණෙන්නේ ඔහුගේ ලේලියගේ සිහසුනට පත්වීමේ උත්සවයට සහභාගී විය නොහැකි බව පැවසීමට පමණි.
උත්සවය සැලසුම් කිරීමේ කාර්යය පිලිප්ට භාරදී ඇති අතර එය රූපවාහිනියෙන් විකාශය කිරීමට තීරණය කරයි. ඉතිහාසයේ පළමු වතාවට, එක්සත් රාජධානියේ සහ විදේශයන්හි මිලියන සංඛ්‍යාත ජනතාවකට රැජින සිය රාජකීය දිවුරුම ලබාදීම නැරඹීමට අවස්ථාව මෙයින් ලැබේ. 1953 ජුනි 2 වන දින එලිසබෙත් කුමරිය දෙවන එලිසබෙත් රැජින ලෙස දිවුරුම් දෙනු ලබයි. මෙහිදී සිදුවන සුවිශේෂීම සිදුවීම එඩින්බරෝ ආදිපාදවරයාට හෙවත් පිලිප් කුමරුට නව රැජිනට සිය පක්ෂපාතීත්වය පෙන්වීමට දණින් වැටී ආචාර කිරීමට සිදුවීමයි. වින්ඩ්සර් ආදිපාදවරයා සහ ඔහුගේ බිරිඳ උත්සවය පැරීසියේ සිට රූපවාහිනියෙන් නරඹති.
රැජිනගේ සහෝදරිය වන මාග්‍රට්, කපිතාන් පීටර් ටවුන්සෙන්ඩ් සමඟ විවාහ වීමට අවසර ඉල්ලයි. පීටර් ටවුන්සෙන්ඩ්ගේ පෙර විවාහය දික්කසාදයෙන් අවසන් වී තිබුණි. රාජකීය සාමාජිකයින් එයට සිය විරෝධය දක්වයි. රාජකීය සාමාජිකයන්ගේ අදහස කුමක් වුවත් පුවත්පත් වාර්තා කරන්නේ ප්‍රේම සම්බන්ධය හේතුවෙන් මහජනතාව මෙම යුවළ කෙරෙහි ඇල්මක් දක්වන බවයි. 1772 රාජකීය විවාහ පනත නිසා මාග්‍රට් කුමරිය සිය 25 වන උපන්දිනය තෙක් බලා සිටිය යුතු බව රැජින පවසයි. මාග්‍රට් කුමරිය දකුණු රොඩේෂියාවේ සිටින අතර පීටර් ටවුන්සෙන්ඩ් බ්‍රසල්ස් හි තනතුරකට යවනු ලැබේ.
වින්ස්ටන් චර්චිල් සහ විදේශ ලේකම් ඇන්තනි ඊඩන් යන දෙදෙනාම අසනීපයෙන් සිටින බවට පුවත් නිකුත් වේ. සමපේක්ෂනය නොතකා ඔවුන් දෙදෙනාම එය සැඟවීමට උත්සාහ කරයි. අසනීප තත්වය හේතුවෙන් චර්චිල්ට ජනාධිපති අයිසන්හවර් සමඟ පැවති රැස්වීමක් අවලංගු කිරීමට සිදුවේ. මේ අතර ඊඩන් බොස්ටන්හි රෝහලක සාර්ථක සැත්කමකට භාජනය වේ. මේ සියල්ල සිදුවන අතර ලෝක නායකයන් සහභාගී වන රාතී භෝජන සංග්‍රහයකට රැජිනට ආරාධනා ලැබෙයි. ලෝක නායකයන් සමඟ කථාකිරීමට තමා එතරම් සූදානම් නොමැති බව එලිසබෙත් රැජිණට දැනෙන අතර ඒ හේතුවෙන් ඇය තම දැනුම නංවාලීම සඳහා පෞද්ගලික උපදේශකයෙකු බඳවා ගනී.
එලිසබෙත් රැජින සහ පිලිප් කුමරු මාස හයක පොදුරාජ්‍ය මණ්ඩලීය සංචාරයක් සඳහා පිටත්ව යයි. මේ කාලය තුළ රාජ්‍ය කටයුතු භාර වන්නේ අතර මාග්‍රට් කුමරිය වෙතයි. මව රැජින ස්කොට්ලන්තයට යන අතර එහිදී ඇය මාලිගාවක් මිලදී ගැනීමට තීරණය කරයි.
අශ්ව ධාවන තරඟ සඳහා දැඩි ඇල්මක් ඇති රැජින, ඇගේ අශ්වාරෝහක කළමනාකරු වන හත්වන අර්ල් ඔෆ් කාර්නර්වොන් සමඟ නව අශ්වයන් මිලදී ගැනීම සලකා බලයි. රාජකීය රාජකාරි සහ පවුල් ජීවිතය අතර නිවැරදි සමබරතාවයක් සොයා ගැනීමට එලිසබෙත්, පිලිප් යුවල වෙහෙසෙද්දී ඔවුන් අතර යම් යම් ඝට්ටන හා අර්බූදයන් ඇතිවීමට පටන් ගනියි.
චර්චිල් සිය 80 වන උපන්දිනය සමරයි. තමන්ගේ පින්තූරයක් චිත්‍රයට නැඟීමට චිත්‍රශිල්පියකුට නියම කර ඇත. එම චිත්‍රය ඔහු ඔහුගේ උපන්දින දේශනයෙන් පසුව නිරාවරණය කරයි. චිත්‍රයෙන් දැක්වෙන්නේ වයසක හා දුබල මිනිසෙකුයි. මෙය දකින ඔහු අධික කෝපයට පත් වූවත් අවසානයේදී ඔහු ඉල්ලා අස්විය යුතු වයසට පැමිණ ඇති බව අවබෝධ කරගනියි.
ඩවුන් 10 වීදියේ ඔහු සමුගැනීමේ සාදයක් පවත්වන අතර රැජින ද එයට සහභාගී වේ. ඉල්ලා අස්වීමෙන් දින කිහිපයකට පසුව ඇන්තනි ඊඩන් අගමැති බවට පත් වෙයි.
පීටර් ටවුන්සෙන්ඩ් නැවත එංගලන්තයට පැමිණීම මාග්‍රට් කුමරිය සමඟ විවාහ ගිවිස ගැනීම පිළිබඳ සමපේක්ෂනයකට තුඩු දෙයි. ඒ වන විට ඇය 25 වන වියටද පා තබා ඇත. එහෙත් කැබිනට් මණ්ඩලය, පාර්ලිමේන්තුව සහ එංගලන්ත පල්ලිය යන සියල්ලම ඇගේ ඉල්ලීම ප්‍රතික්ෂේප කරන අතර, සිය පෙම්වතා සමඟ විවාහ විය හැකි බවට තම සහෝදරියට පොරොන්දු වුවද විවාහය නතර කිරීමට ඇයට සිදුවන බව රැජිනට බල කෙරෙයි. අර්බූදකාරී අවස්ථා රැසකින් පසුව මාග්‍රට් කුමරිය නිවේදනය කරන්නේ ඇය ටවුන්සෙන්ඩ් සමඟ විවාහ නොවන බවයි.
කථාමාලාවේ 7 වන කථාංගය හෙවත්, Scientia Potentia Est, කථාංගය ආරම්භ වන්නේ තරුණ එලිසබෙත් රැජින ඊටන්හි උප ප්‍රොවොස්ට්වරයා සමඟ ආණ්ඩුක්‍රම ව්‍යවස්ථාව හැදෑරීමේ දර්ශනයකින්.
“පාලනය කිරීමට ක්‍රම දෙකක් තිබේ: ගෞරවනීය මාර්ගය සහ කාර්යක්ෂම මාර්ගය” ඔහු උගන්වයි.
“දේශපාලනඥයන් කාර්යක්ෂමව පාලනය කරන අතර රජෙක් හෝ රැජිණක් ගෞරවනීය ආකාරයෙන් පාලනය කළ යුතුය.”
තම සියලුම සිසුන්ට මෙය උගන්වන්නේ දැයි එලිසබෙත් වයිස් ප්‍රොවොස්ට්ගෙන් ඇසූ විට ඔහු හිස වනමින් ඇයට ජ්‍යාමිතිය පොතක් පෙන්වයි. “අන් අය ඉගෙන ගන්නේ මෙයයි” ඔහු කියයි. ඇයත් ජ්‍යාමිතිය හැදෑරිය යුතුදැයි එලිසබෙත් ඔහුගෙන් විමසූ විට ඔහු ප්‍රතිචාර දක්වන්නේ, “අනේ නෑ, එය අපකීර්තියක් වනු ඇත” යනුවෙනි.
එක් අවස්ථාවකදී අශ්ව ධාවන පාඩමකින් පසු, එලිසබෙත් සිය අශ්ව ධාවන උපදේශකයා සමඟ කුඩා කතාබහ යෙදීමෙන් පසු, එලිසබෙත් තේරුම් ගන්නේ ඇය සිය “ගෞරවනීය” උපදේශකයාට වඩා අශ්වයන් බෝ කිරීම සහ ධාවන තරඟ ගැන දන්නා බවයි. මේ අවස්ථාවේදී ඇයගේ මුහුණේ ඇදෙන්නේ ජයග්‍රාහී සිනහවකි, එයින් ඇය හැඟෙන්ඇනේ ය රැජිනක් වීමට සුදුසු අයෙක් බවයි.
බ්‍රිතාන්‍ය ඉතිහාසය දිග හැරීමට The Crown කතාමාලාව සුවිශේෂී වේදිකාවක් සකසා දෙයි. එලිසබෙත් – පිලිප් අතර විවාහය වසර 70 කට ආසන්න කාලයක් පැවතුන බව අපි දනිමු. චර්චිල් යළිත් අගමැති වනු ඇති බව අපි දනිමු. ජෝර්ජ් රජු තව වසර කිහිපයකින් මිය යනු ඇති බව අපි දනිමු. 25 හැවිරිදි ලිලිබෙට්, දෙවන එලිසබෙත් රැජින බවට පත්වන බවත් අප දනිමු. එහෙත් ඒ සියල දැන දැනත් අප තවදුරටත් මෙම කතාමාලාවේම එල්බ සිටින්නේ එහි ඇති රසවත් බව නිසාවෙනි.
The Crown: Wolferton Splash හෙවත් මංගල කථාංගය
The Crown හී දෙවන කොටසෙන් හමුවෙමු.
