BORDERS MAY DIVIDE US, BUT HOPE WILL UNITE US.
මායිම් අප වෙන් කළ ද, බලාපොරොත්තුව අප එක්කරයි.

නිදහසේ ගීතිකාව Ode To Freedom සමඟින් ABBA සිය ‘අවසාන’ ඇල්බමය Voyage එළිදක්වයි!

වසංගතයකින් පීඩා විඳින මුළුමහත් ලොවක් මේ ගත කරන්නේ සුන්දර කාලවකවානුවක් නම් නොවෙයි. සෞඛ්‍යයට ප්‍රමුඛතාවය ලබාදෙමින් නිවෙස්වලට කොටුවූ අපට වසංගතය කියා දුන් පාඩම් බොහෝ ය.

ලෙඩ රෝග වලට ජාති ආගම් කුල බේද අදාළ නැත. ඔබ කලු ද සුදු ද යන්න අදාළ නැත. විෂමලිංගික ද සමලිංගික ද යන්න අදාළ ද නැත. බෙදීම් ඇතිකරගෙන තිබෙන්නේ අප විසින්ම ය. බැඳි වැටකඩුලු කොපමණ සම්මුතිගත ද යන්න අවබෝධ වන්නට මෙවන් සෞඛ්‍ය ආපදාවක් උදාවන තුරුම මිනිසා කල්මැරීය.

70 දශකයේ ගීත අමන්දානන්දය ABBA තිස්නම වසරක නිහැඬියාවකින් පසුව සිය සංගීත රාවය නැවත වරක් ලොවපුරා  නාදවීමට නියමිත බව මුල්ම වරට දැනුම් දුන්නේ ඉකුත් අගෝස්තු මස ය; දිදුලන ග්‍රහලෝක සතරක් සහිතව Voyage නම් සංගීත ව්‍යාපෘතියක් සැප්තැම්බර් 02 වන දින දියත් කරන බවට සිය නිල වෙබ්අඩවි හා සමාජ මාධ්‍ය ජාලා වල පණිවුඩයක් නිකුත් කර තිබිණි.

ඒ අනුව ඇග්නේතා, බියෝර්න්, බෙනී සහ ඇනිෆ්‍රිඩ් හෙවත් ABBA  තවත් එක් වතාවක් පීඩාවට පත් ජනතාවගේ සිත් පහන් කිරීමට සිය ගීත හඬ අවදිකිරීම එදින සිදුවිය. සැප්තැම්බර් 02 වන දින ශ්‍රී ලංකාවේ වේලාවෙන් රාත්‍රී 10.15 ට යූටියුබ් සමාජ මාධ්‍ය ජාලය හරහා නිකුත් කළ සජීවී විකාශයේ තම Voyage නම් සංගීත ව්‍යාපෘතිය හරහා ABBA සංගීත කණ්ඩායම විසින් පැවැත්වීමට නියමිත ඉදිරි වැඩකටයුතු කිහිපයක් පිළිබඳවම තොරතුරු සැලකරයි. I Still Have Faith In සහ You Don’t Shut Me Down නමින් නවතම ගීත දෙකක් ද එදින එළිදැක්වූ අතර, මෙම සජීවී වැඩසටහනේදී ABBA කළ හෙළිදරව්ව ලොවපුරා මිලියන සංඛ්‍යාත බාල මහලු රසිකයින් දශක හතරක් පුරාවට දල්වාගෙන සිටි බලාපොරොත්තුවක් සඵල කළේය.

ABBA නවතම ගීත එකතුවක් Voyage නම් ඇල්බමය හරහා එළිදැක්වීමට නියමිත බව එදින හෙළිකළේය!

මෙම ගීත එකතුව ඇල්බමයක් ලෙස අද (නොවැම්බර් 05) එළි දැක්වීම සිදුවිය. නවතම ගීත 10කින් සමන්විත Voyage නම් ඇල්බමය ඩිජිටල් වේදිකාව තුළ මිළදී ගැනීමට හැකි සේම සංයුක්ත තැටි, වයිනයිල් තැටි ආදී වශයෙන්ද මිළදී ගැනීමට හැකිය. ඇසුවන් වසඟයට පත්කළ ඇග්නේතා ගේ ඉහළ පරාසයේ කටහඬ ද, ගායන ශ්‍රේෂ්ඨත්වය සනිටුහන් කරන ඇනිෆ්‍රිඩ් ගේ පහළ පරාසයේ කටහඬ ද, බියෝර්න් ගේ මනරම් ගිටාර් නාදය ද, බෙනී ගේ අතිවිශිෂ්ඨ පියානෝ නාදය ද මුසු කළ ABBA සංගීතය තිස්නම වසරකට පසු යළි මෙසේ දිගහැරෙයි. I Still Have Faith In You, When You Danced With Me, Little Things, Don’t Shut Me Down, Just A Notion, I Can Be That Woman, Keep An Eye On Dan, Bumblebee, No Doubt About It සහ Ode To Freedom ආදී ගීත 10ක් මෙම Voyage ඇල්බමයේ අඩංගුය.

මීට අමතරව, එළඹෙන 2022 වසරේදී සජීවී සංගීත ප්‍රසංගයක් ද පැවැත්වීමට නියමිත බව ABBA සැප්තැම්බර් 02 වන දින පැවති සජීවී වැඩසටහන හරහා හෙළිකළේය. මෙම සංගීත ප්‍රසංගයේ විශේෂත්වය නම්, එය සිදුවන්නේ ත්‍රිමාණ සජීවීකරණයෙන් සිය තරුණ අවධියේ පෙනුම යළි ප්‍රතිනිර්මාණය කළ හොලොග්‍රෑම් ABBA සාමාජිකයන් සිව් දෙනෙකු විසින් ය. දශක හතක පමණ ආයු වැළඳූ ABBA සාමාජිකයන් සිව් දෙනා වන ඇග්නේතා, බියෝර්න්, බෙනී සහ ඇනිෆ්‍රිඩ් මේ වන විට සිය ජීවිතයේ සැඳෑ සමය ගත කරමින් සිටින අතර, ඔවුන්ගේ තරුණ අවධියේ පෙනුම නවීන තාක්ෂණය හරහා යළි ප්‍රතිනිර්මාණය කොට මෙම හොලොග්‍රෑම් සංගීත ප්‍රසංගය නිර්මාණය කිරීම ඔවුන් විසින් ගනු ලැබූ උපායමාර්ගික වැඩපිළිවෙලකි. ඊට හේතුව වන්නේ මෙම ප්‍රසංගය ලොව පුරා මිලියන සංඛ්‍යාත ABBA රසිකයින් අතර ABBA සංගීත කණ්ඩායමේ සේයාව මතකයේ රැඳී ඇති අන්දමට ම යළි ආවර්ජනය කරවීමයි.

මතුදිනක ABBA ජීවතුන් අතර නොසිටීවි. නමුත් ඔවුන් ඉතිරිකළ සංගීත උරුමය සදා ඩිජිටල් සංඛ්‍යාත තුළ රැඳේවි. ABBA සන්නාමය හා සේයාව සදා අමරණීය වනු ඇත. මෙම හොලොග්‍රෑම් ප්‍රසංගය ඊට කදිම සාක්ෂියක් වනු ඇත.

ABBA පළමුවරට ලෝ ජනාදරය ට පාත්‍ර වන්නේ 1974 වර්ෂයේ Waterloo නම් ගීතය හරහා Eurovision Song Contest තරඟාවලිය ජයග්‍රහණය කිරීමෙන් අනතුරුවයි. ABBA යනු ඉංග්‍රීසි බස කතා නොකරන රාජ්‍යයක සිට පැමිණ ජාත්‍යන්තර සංගීත වේදිකාව ආක්‍රමණය කළ ඉතිහාසයේ පළමු සංගීත කණ්ඩායමයි. සංගීත ක්ෂේත්‍රය තුළ සක්‍රියව කටයුතු කළ සමයේ ගීත ඇල්බම නවයක් ද ගීත සියයකට ආසන්න සංඛ්‍යාවක් ද පටිගත කළ ABBA ජාත්‍යන්තර සංචාරක ගීත ප්‍රසංග සමඟින් යුරෝපයෙන් පිටත රටවල් බොහොමයක ප්‍රේක්ෂක ප්‍රතිචාරය දිනා ගැනීමට සමත් ව ඇත.

ABBA සංගීතය නූතන සංගීත කලාව තුළ පමණක් නොව, 70 දශකයේ ද සුවිශේෂීත්වයක් ගත්තේ ඔවුන් හුදෙක් රැල්ලට යන සංගීත කණ්ඩායමක් නොවූ නිසා ය. ABBA කිසිවිටක ආගමික වූයේ නැත, නිරාගමික වූයේ ද නැත. සමාජවාදී වීමට ගියේ නැත, එහෙත් ධනවාදය පෝෂණය ද නොකළේය. ABBA වේදිකාව ඕනෑම පුද්ගලයකුට විවෘත වූ අතර, ලොව විවිධ අනන්‍යතා දරන ප්‍රජාවන් වැඩිම ප්‍රමාණයක් ආදරය කරන සංගීතඥයන් අතර ABBA අනිවාර්ය සාමාජිකත්වය දැරීය. ආදරය, විරහව, විවාහය, දික්කසාදය, ලිංගිකත්වය, අභිමානය, මුදල් මත දුවන ලෝකය, සීතල යුද්ධය (cold war), කලා ක්ෂේත්‍රයේ අඳුරු පැතිකඩ, මධ්‍යම පාන්තිකයාගේ අරගලය, දරුපරපුර, කාන්තා විමුක්තිය, සමානාත්මතාවය ආදී තේමාවන් ගණනාවක් යටතේ ABBA ගීත ගායනා කළේය.

1971 වසරේ කණ්ඩායම් ගත වූ ABBA පෞද්ගලික හේතු මත 1983 වසරේ විසිර ගියේ යළි කිසිදිනක එක්ව ව්‍යාපෘතියක් දියත් නොකරන බව පවසමිනි. එහෙත්, තිස්නම වසරකට පසු පොප් සංගීතයේ රාජකීයත්වය දරන මෙම දූතයන් සතර දෙනා නැවත වරක් පොළවට ගොඩබෑවේ, ඔවුන්ගේ පිහිට ලෝ වැසියන්ට අත්‍යාවශ්‍යම මොහොතක බව කිව යුතුය. තිස්නම වසරකට පසු මෙසේ එළිදැක්වෙන Voyage ඇල්බමය සිය අවසාන ගීත ඇල්බමය වනු ඇති බව ABBA මාධ්‍ය වෙත පවසා තිබේ. ඊට එරෙහිව මැසිවිලි නැඟීමට ද අප කුහක නොවිය යුතුය. Voyage ඇල්බමයට ප්‍රවේශමෙන් සවන් දෙන ලෙස මම ඔබට යෝජනා කර සිටිමි. ඇල්බමයේ අවසාන ගීතය වන Ode To Freedom ඔබ ශ්‍රවණය කළේ නම්, ගින්නෙන් දැවෙන ලොවක් බේරා ගැනීමට දෙව්ලොව සිට පැමිණි දූතයන් සතර දෙනෙකු සිය යුතුකම ඉටුකොට යළි සමුගැනීමට සූදානම් වන බවක් නිසැකවම ඔබට දැනෙනු ඇත.

මට දැනුනේ එයයි..

 


චිප් හිඟයයට පිලියමක්

ෆ්ලොරිඩාවට ඔබ්බෙන් වූ ‘මිනිස් ජාවාරම්’ බෝට්ටුවක් අනතුරකට ලක්​වේ

ප්‍රස්තා පිරුළක් කියා ජනපතිට අපහාස කළැයි තුර්කි මාධ්‍යවේදිනියක් සිරගත කරයි!

ලෝකයේ විශාල සමාගම් රැසක කඩාවැටීමක් – ලොකුම කෝටිපතියන්ට සතියක් ඇතුළත ඩොලර් බිලියන ගණනක් අහිමි වෙලා!

යේමන් බන්ධනාගාරයකට මාරක ගුවන් ප්‍රහාරයක් – 70කට වඩා මරුට

ශ්‍රී ලංකාවේ උභතෝකෝටිකය: ආහාර ද්‍රව්‍යද, විදුලිය සඳහා ඉන්ධන ද? – ජාත්‍යන්තර මාධ්‍ය ඇසින්

අප්‍රිකානු ටයිකොන්ඩෝ සූරතාවලිය රුවන්ඩාවට?

ඔබේ වැසිකිළියේ ශබ්දය, අසල්වැසියාගේ මානව හිමිකම් උල්ලංඝනය කරනු ඇත! – කවුරු කොහොම කිව්වත්, ඉතාලිය තමයි ‘හොඳටම කරේ’!

error: Content is protected !!
error: Content is protected !!