බ්‍රිතාන්‍ය අග්‍රාමාත්‍ය බොරිස් ජොන්සන් මහතා කොරෝනා වෛරසය ආසාදනය වීමේ පුවත වාර්තා වූයේ ඉකුත් මාර්තු 27 වන දින ය. විදෙස් මාධ්‍ය වාර්තා කර තිබූ පරිදි ඒ මහතා ගේ තත්ත්වය බරපතල අතට හැරී තිබිණ.
මේ වන විට බොරිස් ජොන්සන් මහතා සුවය ලබා තිබේ. එහෙත් බ්‍රිතාන්‍ය කන්සර්වටිව් පාක්ෂික ජනතාවට මෙන්ම ඒ මහතා ප්‍රිය කළ ලොව වටා වෙසෙන බොහෝ පුද්ගලයන් ගේ ප්‍රීතියට තුඩු දුන් එකම පුවත එය නොවේ.
දෙමාපිය වරම් ලැබූ බොරිස් ජොන්සන් සහ සහ කැරී සිමන්ඩ්ස් ගේ කැදැල්ලට මෙලොව එළිය දුටු කුළුඳුල් පුතු විල්ෆ්‍රඩ් ද එකතු වූ එකී දෙවන පුවත පසුගිය දින වල කා අතරත් කතා බහට ලක්වී තිබිණි.
මේ වන විට බ්‍රිතාන්‍ය අග්‍රාමාත්‍යවරයා තමා කොරෝනා ආසාදනය වූ කාලය තුළ ලැබූ අත්දැකීම් මාධ්‍ය වෙත ප්‍රකාශ කොට තිබේ. බ්‍රිතාන්‍ය පුවත්පතකට ප්‍රකාශයක් ලබා දෙමින් ඒ මහතා හෙළිදරව් කොට තිබෙන්නේ තමා හට ප්‍රතිකාර කළ වෛද්‍යවරුන් තමාගේ මරණය ප්‍රකාශ කිරීමට සූදානමින් සිටි බවයි.
කොරෝනා වෛරස ආසාදනය වීමත් සමඟ සිය ජීවනාලය පවත්වා ගැනීමට බ්‍රිතාන්‍ය වෛද්‍යවරුන් අපමණ කැපකිරීමක් කළ බව පෙන්වා දෙන ඒ මහතා අවධාරණය කළේ ඔක්සිජන් ලීටර ගණනින් ලබා ගැනීමට තමා ට සිදුවූ බවයි.
එය අසීරු මොහොතක්, මම ප්‍රතික්ෂේප කරන්නේ නැහැ. රුසියානු විරෝධී මත ප්‍රවර්ධනය කළ බවට චෝදනා ලැබ සිටි ද ඩෙත් ඔෆ් ස්ටාලින් චිත්‍රපටය උදාහරණයට ගනිමින් ඒ මහතා ප්‍රකාශ කර සිටියේ වෛද්‍යවරුන් ද පත්ව සිටියේ එවන් ක්‍රමෝපායක් කෙරේ යොමුවීමට බවය.
“මම සිටියේ විශිෂ්ට තත්ත්වයක නොවෙයි. මම දැන සිටියා ඔවුන් සිටියේ අවිනිශ්චිතව බව. යම් හෙයිකින් ඉතාම නරක දෙයක් සිදුවීමට ඉඩ තිබුණා නම් වෛද්‍යවරුන් එයට සූදානම් ව සිටියා. ඔවුන් මා හට මුහුණු ආවරණයක් ලබා දුන්නා. එමඟින් ලීටර ගණන් ඔක්සිජන් ලබා දුන්නා බොහෝ කාලයක් යන තුරු. මාගේ නාසය ප්‍රතිසැකසුම් කිරීමට ද සිදුවූවා.”
බ්‍රිතාන්‍ය අග්‍රාමාත්‍යවරයා ගේ තත්ත්වය බරපතල බව කාටත් වැටහුණේ ඔහු දැඩි සත්කාර ඒ්කකයට යොමු කිරීමත් සමඟ ය.
දැඩි සත්කාර ඒ්කකයේ ලැබූ අත්දැකීම් ආවර්ජනය කළ බොරිස් ජොන්සන් මහතා – “ප්‍රතිකාර අතරතුර අර පිස්සු යන්ත්‍රයේ ගණනය කිරීම් වැරදි පැත්තට ගිය බව තේරුණා. මම දැනගත්තා කොවිඩ්-19 නිට්ඨාවට සුවකරන්න බැරි බව. මම නිතරම කල්පනා කළේ කොහොමද මෙයින් ගැලවෙන්නේ කියා.”
දිගින් දිගටම තම සෞඛ්‍යය තත්ත්වය පිරිහෙමින් තිබූ බවත්, එමඟින් තම ජීවිතයට කළකිරීමක් දැණුන බවත්, මෙම රෝගී තත්ත්වය සුව අතට පත්නොවන්නේ මන්ද යන්න පිළිබඳ කණගාටුවෙන් පසුවූ බවත් ඒ මහතා ප්‍රකාශ කළේය.
තම අත්දැකීමේ නරකම අවධිය මතුවූයේ ජීවිතයද මරණය ද යන්න පිළිබඳ 50-50 මොහොත එළැඹි විට දී බව හෙතෙම අවධාරණය කළේය. එම මොහොතේ වෛද්‍යවරුන් තමාගේ ශ්වාසනාලය වෙත බටයක් දැමිය යුතුය යන ස්ථාවරයේ පසුවූ බවද ඒ මහතා සඳහන් කළේය.
“මෙන්න මේ වෙලාවේදී තමයි… ඇත්තටම ඔවුන් කල්පනා කරේ කොහොමද මේ තත්ත්වේ මෙහයවා ගන්නේ විනීතව කියා..”
සති දෙකක කාලයක් පුරා තම මරණ මංචකය අභියස වීනා නඳ ඇසෙන නෑසෙන මානයේ සිටි බොරිස් ජොන්සන් මහතා අද දින 10, ඩව්නින් වීදියේ සිය කාර්යාලයේ සතුටු කඳුළු මැද කාලය ගත කරයි. ඒ, ජීවිතයත් මරණයත් අතර ද්වන්ධ සටනක නිරත ව කොරෝනා ආසාදනයෙන් සුවය ලබා තම ජීවිතයේ ප්‍රීතිමත්ම පුවත දෑතෙහි තබා ගනිමිනි.
බොරිස් ජොන්සන් මහතා සය වෙනි වරටත් දැන් පියෙකි!
