KGB පුටින්ට ජර්මානු පොලිසියෙන් හැඳුනුම්පතක්!

එහි ඔහුගේ නම සඳහන් කර තිබෙන්නේ “Maj Vladimir Putin” යනුවෙනි.

සෝවියට් යුගයට අයත් පුද්ගලික ලිපිගොනුවක තිබී මෙය හමු වී ඇත්තේ ජර්මනියේ ඩ්‍රෙස්ඩෙන් නගරයෙනි.

පුටින්, 1980 දශකයේදී KGB රහස් ඔත්තුකරුවෙකු ලෙස කටයුතු කළ බව සැවොම දන්නා කරුණකි. ඔහු ජර්මනියේ ඩ්‍රෙස්ඩෙන් නගරයේ ද සේවයට යොදවා තිබිණි.

ජර්මනියේ ‘බිල්ඩ්‘ පුවත්පත විසින් මෙම හැඳුනුම්පතේ ඡායාරූපයක් ද පළ කර ඇති අතර, එහි නිල මුද්‍රාවන් ද තිබෙන බව සඳහන් ය. එය 1989 වසරේ අග භාගය දක්වාම වලංගු ව තිබූ හැඳුනුම්පතක් වේ.

මෙය සොයාගෙන තිබෙන්නේ ‘ස්ටාසි‘ ලේඛනාරක්ෂණාගාරයේ තිබියදී ය. ස්ටාසි යනු, පැරණි නැගනෙහිර ජර්මානු සමූහාණ්ඩුවේ රාජ්‍ය ආරක්ෂක සේවයයි. එය Stasi Records Agency හෝ BStU යනුවෙන් හැඳින්වේ.

මෙම ස්ටාසි ලේඛනාරක්ෂණාගාරයේ ප්‍රධානියා සඳහන් කරන්නේ මෙම කාඩ්පත තිබෙන විට පුටින් ට කිසිදු අවහිරයකින් තොරව ස්ටාසි කාර්යාලවලට පිවිසීමට හැකියාව ලැබුණු බවයි. එසේම රහස් ඒජන්තයන් බඳවා ගැනීමට ද මෙමගින් පහසු වේ. එයට හේතුව වන්නේ, මෙම හැඳුනුම්පත තිබෙන විට තමන්ගේ KGB සම්බන්ධය ඔහු විසින් පැවසිය යුතුව නැති නිසා ය.

පුටින්ට මේ ආකාරයේ ස්ටාසි හැඳුනුම්පතක් තිබූ බව ක්‍රෙම්ලිනය පිළිගෙන නැති අතර, එම පුවත ප්‍රතික්ෂේප කර ද නැත. ‘‘ඒ සෝවියට් යුගයේ කේජීබී සහ ස්ටාසි, සහෝදර සේවාවන් සේ කටයුතුකළා. ඒ නිසා මේ අන්දමින් හැඳුනුම්පත් හුවමාරු කර ගැනීමට නීතියෙන් ඉඩ ලැබෙන්න ඇති“ යැයි ක්‍රෙම්ලිනයේ ප්‍රකාශකයෙකු සඳහන් කරයි.

රුසියානු නායකයා බවට පසු කලෙක පත්වූ ව්ලැදිමීර් පුටින් ඩ්‍රෙස්ඩෙන් හි ගත කළ රහස් ජීවිතය පිළිබඳ තොරතුරු හෙළි වී තිබෙන්නේ මද වශයෙනි. 1980 දශකයේ මැද භාගයේදී පුටින් ඩ්‍රෙස්ඩෙන් නුවරට පැමිණි බව සඳහන් ය. ඒ, කේජීබී සංවිධානය වෙනුවෙන් සිය ප්‍රථම රාජකාරිය ඉටු කරන්නට ය.

1989 අගභාගයේ, එනම් දෙසැම්බර් 5 වැනිදා පුටින් රුසියාවට දුරකථනයෙන් කතා කර ඇත. ඒ, KGB මූලස්ථානය වටලෑම සඳහා පිරිසක් පැමිණ සිටි හෙයින් ඔවුන්ට විරුද්ධව ගත යුතු ක්‍රියාමාර්ගය පිළිබඳ උපදෙස් ලබාගැනීමට ය.

නමුත් ඒ අවස්ථාවේදී ‘රුසියාව නිහඬව සිටියා‘ යැයි පුටින් පසුව සිය චරිතාපදානයක සඳහන් කර ඇත.

මෙම පිරිස විසුරුවා හැරීමට පුටින් කටයුතු කර තිබෙන්නේ උපක්‍රමශීලී ලෙස ය. ඔවුන් KGB ද්වාරය පසුකිරීමට සූදානම් වුවහොත් සියලුම දෙනාට වෙඩි කෑමට සිදුවන බවට ඔහු පුරසාරම් කියා තිබේ. මේ වන විට සෝවියට් සංගමය පමණක් නොව නැගෙනහිර හා බටහිර ජර්මනිය ද දෙදරා ගොස් තිබිණි. නැගෙනහිර හා බටහිර ජර්මනිය දෙකඩ කළ බර්ලින් තාප්පය බිඳ දමා ගත වී තිබුණේ මාසයකත් නොඅඩු කාලයකි.

ස්ටාසි ලේඛනාරක්ෂණාගාරයේ වෙනත් ප්‍රකට රුසියානු නිලධාරීන්ගේ හැඳුනුම්පත් ද දැකගන්නට ලැබේ. පුටින් සමග එකට KGB වෙනුවෙන් ඩ්‍රෙස්ඩෙන් නුවර සේවය කළ නිකොලෙයි තොකරෙව් සහ සෙර්ගෙයි කෙමසොව් මේ අතර වේ. මේ දෙදෙනාගෙන් නිකොලෙයි තොකරෙව් මේ වන විට රුසියාවේ ගමනාගමන ඒකාධිපතිත්වය දරන ට්‍රාන්ස්නෙෆ්ට් හි ප්‍රධානියා ය.  සෙර්ගෙයි කෙමසොවව් රුසියාවේ ප්‍රකට ආයුධ නිෂ්පාදකයෙකු වන රොස්ටෙක් හි ප්‍රධානියා ය. ඔවුන් දෙදෙනා කෙරෙහිම පුටින් තවමත් දැඩි විශ්වාසයක් තබන බව ද පෙනී යයි.

KGB හෙවත් Komitet gosudarstvennoy bezopasnosti (Committee for State Security), 1954 වසරේ සිට 1991 වසරේ විසුරුවා හරින තෙක් රුසියාවේ ප්‍රධාන බුද්ධි අංශය වශයෙන් කටයුතු කළේය. පසු කලෙක රුසියාවේ ජනාධිපති වූ පුටින් ‍KGB හි කළේ කුමක්ද? බොහෝ වාර්තාවලට අනුව එය අදට ද රහසකි. විශ්වාස කෙරෙන්නේ වෙනත් රටවල බුද්ධි අංශ මෙහෙයුම් අඩපණ කිරීම සහ, සෝවියට් සංගමයේ දේශපාලන විසම්මුතිකයන් කෙරෙහි ඇස ගසා ගෙන සිටීම කෙරෙහි ඔහු විශේෂඥයෙක් බවයි.

1991 වසරේ වැඩ නිම කළ බව කීවත් KGB සංවිධානය තවමත් ජීවතුන් අතර සිටින බවට සාක්ෂි බොහෝ ය. අතීතයේ KGB නිලධාරීන් වශයෙන් කටයුතු කළ විදේශිකයන් අදට ද රුසියාවේ දැඩි නිරීක්ෂණයට හසු වේ. එංගලන්තයේදී 2018 වසරේ පෝලෝනියම් විකිරණශීලී මූලද්‍රව්‍යය ආසාදනය වීමෙන් දැඩි ලෙස රෝගාතුර වූ ඇලෙක්සැන්ඩර් ලිට්වින්කෝ හිටපු KGB ඔත්තුකරුවෙකි. එපමණක් නොව එංගලන්තයේ සැලිස්බරි හි දී දැඩි ලෙස රෝගාතුර වූ ස්ක්‍රිපාල් ද හිටපු KGB ඔත්තුකරුවෙකි.

මේ ගතවන්නේ රුසියාව තවමත් ලෝකය පුරා සිය චර පුරුෂ සේවය ප්‍රබල ලෙස සිදුකරමින් සිටින බව සනාථ වෙමින් යන සමයකි. රුසියාව යකඩ හස්තයකින් පාලනය කරන පුටින්, තමන් KGB ඔත්තුකාර තරුණයෙකුව සිටි සමයේ බිඳී ගිය සෝවියට් දේශය යළි තමන් යටතට ගැනීමේ න්‍යායපත්‍රයක ද නියැළෙමින් සිටියි. ක්‍රිමියාව යටත් කර ගැනීම එහි එක පියවරකි. එයට අමතරව, චීනය මෙන්ම රුසියාව ද, ලොව පුරා ඇසට නොපෙනෙන තාක්ෂණික යුද්ධයක නිරත වෙමින් අලුත්ම සටන් පෙරමුණු නිර්මාණය කරගෙන තිබේ. රුසියාව අද වන විට චීනයට නොදෙවෙනි චරපුරුෂ රාජ්‍යයකි.