ගිනි ජාලා සහ අවුල් ජාලා ගැන – ධවල මන්දිරයේ කතා කරන පින්තූර

පසුගියදා ජනපති ඩොනල්ඩ් ට්‍රම්ප්, ඩිමොක්‍රටික් සෙනෙට් නායිකා නැන්සි පෙලොසි (ඇය නොබෝ දිනකින් කථානායිකාව බවට පත්වීමට නියමිතයි) සහ ජ්‍යේෂ්ඨ ඩිමොක්‍රටික් සෙනෙට් සභික සහ සෙනෙට් සභාවේ සුළුතර පක්ෂ නායක චක් ෂූමර් සමග සාකච්ඡාවක් පැවැත්වුවා. මෙහි විශේෂත්වය වුණේ, මීට පෙර මෙවැනි සාකච්ඡා ‘වැසුණු කාමරයක්‘ තුළ සිදුකරන ට්‍රම්ප් මෙවර මාධ්‍යවලට මේ අවස්ථාවට ඇරයුම් කර තිබීමයි. එහිදී නැන්සි පෙලොසි සහ ට්‍රම්ප් කිහිප වරක්ම ඇවිළුණා.. CNN පුවත්සේවය, ඔවුන්ගේ සාකච්ඡාවේ විශේෂ අවස්ථා කාච ඇසට හසුකරගනිමින් කියන්නේ, වසර 2020 දක්වා, එනම් ඉදිරි වසර තුළ ධවල මන්දිරයේ ඇවිළෙන්නට නියමිත ගින්දර ගැන සාක්ෂි රැසක් මේ චරිත තුනේ ශරීර භාෂාවෙන් හඳුනාගන්නට පුළුවන් කියලයි.

පහත දැක්වෙන්නේ ට්‍රම්ප්ගේ ඕවල් කාර්යාලය උණුසුම් කළ ඒ විශේෂ සාකච්ඡාවේ කාච ඇසට හසුවුණු තැන් කිහිපයක්.

ට්‍රම්ප් සහ ඔහුගේ ධවල මන්දිර ආධාරකරුවන් විසින් මේ ඩිමොක්‍රටික් සෙනෙට් සභික දෙපළට ආසන පනවා තිබූ ආකාරයත් වැදගත්. ඔවුන් ට්‍රම්ප් සහ උප ජනාධිපති මයික් පෙන්ස් හට ප්‍රබල පෙනුමක් ගෙන එන ආසන පනවා තිබුණා. චක් ෂූමර් සහ නැන්සි පෙලොසි හට, වාඩි වූ විට ඇතුළට එබී යන ආකාරයේ ආසන පනවා තිබුණා. ඒ වගේම ට්‍රම්ප් සහ පෙන්ස් සිටියේ මාධ්‍යවල කැමරාවලට මුහුණට මුහුණලා, ඔවුන්ව හොඳින් කැපී පෙනෙන විදිහටයි. මේ සැකසුම, බලය පෙන්වීමේ ක්‍රමයක් බව පැහැදිලියි.

මේ ඡායාරූපය දෙස හොඳින් බලන්න. ට්‍රම්ප් තමන්ගේ ආසනයේ අද්දර වාඩි වී, චක් ෂූමර් කියන යමකට බාධා කරමින්, තමන්ගේ මතය අවධාරණය කරමින් සිටිනවා. නැන්සි පෙලොසි සහ ෂූමර් යන දෙදෙනා වෙතම නැඹුරු වී සිටියත් මේ සාකච්ඡාවේදී ඔහු වැඩිපුරම නැඹුරු වී සිටියේ චක් ෂූමර් වෙතයි. නමුත් ට්‍රම්ප් කතා කරන බොහෝ අවස්ථාවලදී චක් බලා සිටින්නේ ට්‍රම්ප් දෙස නොවෙයි, නැන්සි පෙලොසි දෙස. ‘‘මේ මනුස්සයාට කියන දේ තේරෙන්නෙ නෑ..‘‘ වැනි මද සිනාවක් චක් ෂූමර්ගේ මුහුණේ ඇඳී තිබෙනවා.

මේ නැන්සි පෙලොසි. එබී යන ආසනයක් පනවා තිබුණත් ඇය විශ්වාසයෙන් යුතුව, අවධාරණාත්මක ලෙස කතා කරනවා. සෘජු කාය විලාසයක් පවත්වා ගන්නවා. තමන්ගේ ශක්තිය නොබියව ට්‍රම්ප් වෙත ප්‍රක්ෂේපණය කරනවා. ‘‘නැන්සි මේ වෙලාවෙ ඉන්නෙ කතා කරන්න ලෙහෙසි තත්වයක නෙවෙයි, මට ඒක තේරෙනවා.“ යැයි ට්‍රම්ප් එක වෙලාවක කිසිම තේරුමක් නැතිව කියනවා. (මෙවැනි හිස්තැන් පිරවීමේ නිරර්ථක වාක්‍ය ට්‍රම්ප්ගේ කතාවේ බොහොමයි) ට්‍රම්ප් එයින් අදහස් කරන්නෙ, ඉදිරියේදී එන නායකත්ව ඡන්දය ගැනයි. නමුත් නැන්සි එසැණින් එයට මේ විදිහට ප්‍රතිචාර දක්වනවා. ‘‘මිස්ටර් ප්‍රසිඩන්ට්, විශාල ජයග්‍රහණයක් ලබාගෙන මෙතැනට පැමිණ සිටින මා විසින් මේ සාකච්ඡාවට ගෙන ආ ජවය විස්තර කරන්න උත්සාහ කරන්න එපා!“

චක් ෂූමර්ගේ ශරීර භාෂාව (body language) හැදෑරීමට වටිනා දෙයක්. මේ සාකච්ඡාවෙන් වැඩි කොටසක ඔහු සිටියේ උරහිස් දෙක එල්ලාගෙන බිමට නැඹුරු වෙලයි. ට්‍රම්ප්ගේ අදහස් සහ මතයන්ට බොහොම අමාරුවෙන් ඇහුම්කන් දෙන විලාසයක් පෙන්නුම් කරමින් ඔහු සිය අතැඟිලි බැඳගෙන සිටිනවා. 2018 මධ්‍යවාර මැතිවරණයෙන් ට්‍රම්ප්ගේ රිපබ්ලිකන් පක්ෂයට අත් වූයේ නොසිතූ පරාජයක්. මේ සාකච්ඡාවේදී ඔහු චක් ෂූමර් ට කිව්වේ, තමන්ගේ තාප්පය ඉදිකරන්න අයවැය ලබාගන්නට බැරි නම් ආණ්ඩුව අවසන් කරන්නට වුණත් තමන් ලැහැස්ති බවයි. ‘‘මම දේශසීමා ආරක්ෂාව වෙනුවෙන් ආණ්ඩුව අවසන් කරන්න වුණත් ආඩම්බරයෙන් ලැහැස්තියි, චක්!“

ඉතින් චක් ෂූමර් මේ විදිහෙ ඉරියව්වකින් සිටීම පුදුමයක් නෙවෙයි!

මේ සිටින්නේ මේ සාකච්ඡාව දෙස බලා සිටින ට්‍රම්ප්ගේ පිරිස. ඔවුන් ධවල මන්දිර සේවකයන්. හිටපු ෆොක්ස් නිව්ස් විධායක බිල් ෂයින් මේ වන විට ධවල මන්දිරයේ සන්නිවේදන අධ්‍යක්ෂවරයායි. ඔහු තමන්ගේ වෘත්තීය පරිචයට ඉඩ දෙමින් බලා සිටින්නේ ට්‍රම්ප් හෝ නැන්සි පෙලොසි දෙස නොව කැමරා දෙසයි. මේ අතරේ, ඉවත් වීමට නියමිත ධවල මන්දිර කාර්ය මණ්ඩල ප්‍රධානී ජෝන් කෙලී සහ ජනාධිපති උපදේශකයන් වන ට්‍රම්ප්ගේ දියණිය ඉවන්කා ට්‍රම්ප් සහ, ට්‍රම්ප්ගේ බෑණා වන ජරෙඩ් කුෂ්නර් නායකයන් දෙස බලා සිටිනවා.

මේ සාකච්ඡාවෙදි සිද්ධ වුණු තවත් වැදගත්ම දෙයක් තමයි, උප ජනාධිපති මයික් පෙන්ස්, වචනයක්වත් කතා නොකිරීම! ඒ වෙනුවට ඔහු වැඩියෙන්ම කළේ ඇස් දෙක මේ විදිහට පියාගෙන, තමන්ගේ නායකයා ට්‍රම්ප්, ඩිමොක්‍රටික් නායකයන් සමග වාග් ප්‍රහාරයේ පැටලෙන ආකාරය අසා සිටීමයි. මේ ඡායාරූපයේදීත් ට්‍රම්ප්, නැන්සි පෙලොසි දෙස නොව චක් ෂූමර් දෙස බලා සිටින ආකාරය හොඳින්ම පැහැදිලියි.

මේ සිටින්නේ තව නොබෝ දිනකින් ධවල මන්දියෙන් ඉවත් වී යාමට නියමිත ධවල මන්දිර කාර්ය මණ්ඩල ප්‍රධානී ජෝන් කෙලී. අසන්තෝෂයට පත් ප්‍රධානියෙකු විසින් දොට්ට දැමීමට නියමිත ජෝන් කෙලී මේ කල්පනා කරන්නේ මොනවා ගැනද?

ට්‍රම්ප්ට විරුද්ධ මත ඉවසා පුරුද්දක් නැහැ. නැන්සි පෙලොසි හෝ චක් ෂූමර්, ඔහු පැවසූ දේවල් අභියෝගයට ලක් කළ හැමවිටම ඔහු මේ අන්දමින් දෙතොල් ඇද කරගෙන තමන් ඉදිරියේ ඇති හිස් අවකාශය දෙස බලාගෙන සිටිනවා.

අද සහ 2020 ජනාධිපතිවරණය අතර කාලයේදී ට්‍රම්ප් අනිවාර්යෙන්ම ඔහුගේ ‘දේශසීමා තාප්පය‘ ඉදිකිරීමේ යෝජනාව අනාගත කථානායිකා නැන්සි පෙලොසි හරහා සම්මත කර ගන්නට උත්සාහ කරාවි. එහි අයවැය යෝජනාව සම්මත නොවුණහොත් ට්‍රම්ප්ගේ බලාපොරොත්තු සුන් වේවි. එවිට ඔහු හැසිරෙන ආකාරය ගැන දැන්මම ඉඟි පළ වී අවසානයි.

නැන්සි පෙලොසි මේ සාකච්ඡාවෙන් පසුව මාධ්‍ය හමුවේ කියා සිටියේ ට්‍රම්ප්ට මේ ‘තාප්පය‘ හරියට ඔහුගේ ‘පිරිමිකම‘ ගැන ප්‍රශ්නයක් වගේ කියලයි.

පෙර ලිපි:

‘‘තාප්පය ඕනෑමයි‘ – ට්‍රම්ප් නැවත කියයි.

ට්‍රම්ප් අතිශය බිය විය යුතු ඇමරිකාවේ බලවත්ම ගැහැණිය

ගිනි ජාලා සහ අවුල් ජාලා ගැන – ධවල මන්දිරයේ කතා කරන පින්තූර