ට්‍රම්ප් ගේ ට්විටර් සෙල්ලම් ලෙල්ලම් වෙන ලකුණු – ගිණුම් තහනමක් ගැන ට්විටර් සමාගම අනතුරු අඟවයි!

ඇමරිකානු ජනපති ඩොනල්ඩ් ට්‍රම්ප් මහතා ගේ ට්විටර් ගිණුම තහනම් වීමේ සම්භාවිතාවක් තිබෙන බවට ට්විටර් සමාගම විසින් අනතුරු අඟවා තිබේ.

ඉකුත් නොවැම්බර් මස පැවති ඇමරිකානු ජනාධිපතිවරණයෙන් ජයග්‍රහණය ලැබූ ඩිමොක්‍රටික් අපේක්ෂක ජෝ බයිඩන් මහතා එළඹෙන 2021 ජනවාරි මස 20 වන දින එක්සත් ජනපදයේ 46 වන ජනාධිපතිවරයා ලෙස ධුරයේ දිව්රුම් දීමට නියමිත ය.

ජනවාරි 20 දින බයිඩන් මහතා එසේ ධුරයේ දිව්රුම් දීමෙන් පසු ට්‍රම්ප් මහතා ගේ නිල ට්විටර් ගිණුම මෙසේ තහනමට ලක්වීම ට ඉඩ පවතින බවට වාර්තා වේ.

ලොව බලවත්ම පුද්ගලයා යන විරුදාවලිය ලැබූ ඩොනල්ඩ් ට්‍රම්ප් මහතා සිය නිල ට්විටර් ගිණුම හැසිරවූ අන්දම පිළිබඳ බොහෝ දෙනෙකුගේ කතාබහට ලක්ව තිබිණි.

ඊට ප්‍රධානතම හේතුව අවස්ථාවන් ගණනාවකදී ම සාක්ෂි රහිත හා පදනම් විරහිත වූ තර්ක ඉදිරිපත් කිරීමට ඔහු පෙළඹ තිබීමයි.

තම දේශපාලනික ප්‍රතිවාදීන් සම්බන්ධව කුමන්ත්‍රණ සිද්ධාන්ත (conspiracy theories) ඉදිරිපත් කිරීමට ට්‍රම්ප් මහතා බොහෝ විට යොදා ගන්නේ තම නිල ට්විටර් ගිණුමයි.

ඔහුගේ මෙම ක්‍රියාකලාපය නිසා ට්විටර් සමාගම විසින් අවස්ථා ගණනාවකදී ම ඔහුගේ ට්විටර් පණිවුඩ වාරණයට හෝ නියාමනයට ලක්කිරීමටත්, අවවාදයන් නිකුත් කිරීමටත් කටයුතු කර තිබිණි.

තම සිතට නැඟෙන්නේ කුමක්ද එය එසැණින් ට්විටර් පණිවුඩ වලට හරවා ප්‍රකාශ කරනු ලබන ට්‍රම්ප් මහතා කිසිවිටකත් මෙම අවවාදයන් වලට අවනත වූ බවක් පෙනෙන්නට නොතිබිණි.

ඒ අනුව, ඔහුගේ මෙම පදනම් විරහිත කුමන්ත්‍රණ තර්ක සමාජගත කිරීමට තවදුරටත් ට්විටර් ජාලය යොදා ගන්නේ නම්, එම ගිණුම තහනමට ලක්වීමට ඉඩ පවතින බවට ට්විටර් සමාගම ප්‍රකාශ කොට තිබේ.

ජනාධිපති ගෙන් ‘සාමාන්‍ය’ පුරවැසියෙකු දක්වා

පසුගිය ජනාධිපතිවරණය පුරාවට ම ට්‍රම්ප් මහතා තම පරාජය අභියස බොහෝ සාවද්‍ය ප්‍රකාශ සිදුකිරීමට තම ට්විටර් ගිණුම යොදාගෙන තිබිණි.

ඒ අතර ඡන්ද ගණන් කිරීමේ කටයුතු වංචනිකව සිදුව ඇති බවටත්, සැබවින්ම මැතිවරණය ජයග්‍රහණය කර තිබෙන්නේ තමා බවත් බොහෝ අවස්ථාවන් හීදී ප්‍රකාශ සිදුකොට තිබිණි.

එහෙත් ඒ කිසිදු අවස්ථාවක තම චෝදනා ඔප්පු කිරීමට ඔහු සතුව සාක්ෂි නොපැවතිණ.

එක්සත් ජනපදයේ ජනාධිපතිධුරය තවමත් හොබවන්නේ ට්‍රම්ප් මහතා බැවින් ඔහුගේ ට්විටර් ගිණුම ලෝක නායකයින් වර්ගීකරණය යටතේ ආරක්ෂා වී පවතී.

එය ට්විටර් ජාලයේ රෙගුලාසි වලට අනුව තහනම් කළ නොහැකිය.

කෙසේවෙතත්, ජෝ බයිඩන් මහතා ධුරයේ දිව්රුම් දීමෙන් අනතුරුව නැවත ට්‍රම්ප් මහතා ඇමරිකානු පුරවැසියකු ලෙස ට්විටර් ජාලයේ වර්ගීකරණය වන බැවින් මෙම බාධකය ඉවත් වනු ඇත.

ඒ අනුව තවදුරටත් කුමන්ත්‍රණ තර්ක ඉදිරිපත් කිරීමට තම නිල ට්විටර් ගිණුම යොදා ගැනීමට ට්‍රම්ප් මහතා කටයුතු කරන්නේ නම්, එම ගිණුම තහනම් කිරීමට සමාගමට කිසිදු බාධාවක් නොමැති බව ට්විටර් සමාජ ජාලයේ නියෝජිතයින් අවධාරණය කළ බවට සඳහන්.

සාමාන්‍ය පුරවැසි කාණ්ඩය යටතේ ට්‍රම්ප් මහතා ට විශේෂ වරප්‍රසාද හිමි නොවන බවටත් එම නියෝජිතයින් වැඩිදුරටත් ප්‍රකාශ කර තිබේ.