වෙනිසියුලාවේ මදුරෝගේ මැජික් සූත්තරේ- අලුත් බැංකු නෝට්ටුව

රටේ දැනට පවත්නා උද්ධමනය පහත හෙළීමේ අරමුණෙන් නව බැංකු නෝට්ටුවක් නිකුත් කරන්නට වෙනිසියුලා රජය පසුගිය දා කටයුතු කළේය. නව නෝට්ටුව හඳුන්වා දී තිබෙන්නේ “බොලිවර් සොබෙරානෝ” (Bolivar Soberano) යන නිමිනි. නිකුත් කරන ලද නෝට්ටුවවක වටිනාකම පැරණි බොලිවර් 100,000ක් පමණ වන බැව් පැවැසේ. නව බැංකු නෝට්ටුවේ භාවිතය ඵලදායී තත්ත්වයකට පමුණුවා ගැනීමේ අරමුණ ඇතිව එය නිකුත් කෙරුණු පසුගිය සඳුදා දිනය එරට බැංකු නිවාඩු දිනයක් ලෙස ප්‍රකාශයට පත් කර තිබිණ.

පැරණි බොලිවර් 2 800 000කට මිල නියම කර තිබුණු ඇතැම් නිෂ්පාදන නව බැංකු නෝට්ටුවට අනුව මිල ලකුණු කර තිබුණේ 28ක් වශයෙනි. මේ අන්දමට මිල වෙනස් කරමින් නව බැංකු නෝට්ටුවේ භාවිතය අනුව කටයුතු කිරීමට හැඩගැසිය යුතු නිසා වෙනිසියුලාවේ ඇතැම් ව්‍යාපාරික ස්ථානත් වසා දමා තිබුණු බවත් සඳහන් වේ.

බැංකු නෝට්ටුව හඳුන්වාදීම සම්බන්ධයෙන් ට්විටර් සටහනක් තබමින් වෙනිසියුලා ජනාධිපති නිකොලොස් මදුරෝ පවසා තිබුණේ තම රජය විප්ලවීය සූත්‍රයක් සොයාගෙන ඇති බවකි. භාණ්ඩ නිෂ්පාදනය සහ වැටුප් අගයන් මූලික කරගත් සමාජයේ පිළිසැකසුම එය කේන්ද්‍රණය කරගෙන සිදුවනු ඇති බවත් ජනාධිපතිවරයා වැඩිදුරටත් එහි දක්වා තිබිණ.

එරට රජයට අනතුරු ඇඟවමින් අන්තර්ජාතික මූල්‍ය අරමුදල පවසා තිබෙන්නේ මේ වසර තුළදී වෙනිසියුලාවේ උද්ධමනය සියයට මිලියනය පසු කරනු ඇතැයි කියාය.

වෙනිසියුලා රජය ගත් නව පියවර විවේචනය කරමින් එරට විරුද්ධ පක්ෂ නායකයකු වන හෙන්රිකිව් කැප්‍රිලෙස් පවසා තිබුණේ රජය “අවසාන ව්‍යසනයටත්” අතගසා ඇති බවකි. රජය සියළු දේ සමඟ සූදු කෙළිමින් ද කිසිදු වග විභාගයක් නැතිව අත්හදා බැලීම් කරමින් ද සිටින බවට හෙතෙම චෝදනා කරයි. කැප්‍රිලෙස්, ජනාධිපති මදුරෝටගේ ක්‍රියා පිළිවෙත විවේචනයට ලක් කරමින් පවසන්නේ ඔහු තම රටේ මිනිසුන් සාගතයකට ඇද දමා ඇති බවකි.

පසුගිය පෙබරවාරියේදී කළ සමීක්ෂණයකින් අනාවරණය වී ඇති අන්දමට වෙනිසියුලාවේ ජනගහනනයෙන් 90%කට අසන්න ප්‍රමාණයක් දරීද්‍රතාවයෙන් පෙළෙති. ජනගහනයෙන් 60%කට ආසන්න ප්‍රමාණයකට ආහාර ගැනීමට ප්‍රමාණවත් මුදල්වත් නැති බැව් එම සමිෂණයෙන් වැඩිදුරටත් පෙන්වා දී තිබිණ.

රටේ ජනයා මුහුණ දී තිබෙන ආර්ථික ගැන අවධානය යොමුකරමින් මදුරෝගේ රජය ක්‍රියාත්මක කරන්නට යන විප්ලවීය සූත්‍රයේ හෙවත් “මැජික් ෆෝර්මියුලා එකේ” මීළඟ අංකය සැප්තැම්බර් පළමුවෙනිදා සිට එරට ජනයාට භුක්ති විඳින්නට ඉඩ ලැබේ. ඒ අනුව එරට වැඩකරන ජනයාගේ අවම වේතනය හැට ගුණයකින් ඉහළ නංවන්නට පියවර ගෙන ඇත. ඒ සඳහා රජය දින 90ක් තුළදී සහය ලබාදෙන බවට ජනාධිපතිවරයා පොරොන්දු දුන්න ද රටේ ජනතාව කියන්නේ මැජික් ෆොර්මියුලා එකේ මේ අංගය ක්‍රියාත්මක කරන්නට අවශ්‍යය මුදල් නොමැති වනු ඇති බවකි.

වෙනිසියුලාව තුළ දැනට පවත්නා ආර්ථික අර්බුධ හේතුවෙන් එරට ජනයා රට හැරයමින් සිටින බව සරණාගතයන් පිළිබඳ එක්සත් ජාතීන්ගේ මහා කොමසාරිස් කාර්යාලය පවසයි. මේ වසර තුළ පමණක් ලක්ෂ පහකට අධික සංඛ්‍යාවක් කොළොම්බියාව හරහා ඉක්වදෝරයට සංක්‍රමණය වී ඇත. මේ තත්ත්වය තවදුරටත් වර්ධනය වෙමින් පවතින බව විදෙස් මාධ්‍ය වාර්තාවල සඳහන් වේ.

පෙර ලිපි

ආර්ථික අර්බුදය උග්‍රවීම නිසා වෙනිසියුලානුවෝ 7% ක් රට හැර යති.