“ඔබ සුදු ආධිපත්‍යයේ හා ජාතිවාදයේ ගිනිදැල් වපුරන්නෙක්..” සුපිරි ගායිකා ටේලර් ස්විෆ්ට් ගෙන් ට්‍රම්ප් ට සැර ප්‍රතිචාරයක්!

වත්මන් කොරෝනා තත්ත්වය තුළ, දිනෙන් දින ඉහළ යන ආසාදිතයින් හා මරණ සංඛ්‍යාව, වසංගතය පාලනය කිරීමෙහි ලා රාජ්‍ය නායකයන් අසමත් වීම, එම වසංගත තත්ත්වය තුළ ජාතිවාදය, ආගම්වාදය වැපිරීම, ඇතැම් රාජ්‍යයන් රෝග පාලනය කිරීම අතින් වෙනත් රාජ්‍ය අභිබවා යෑම, ඇතැම් රාජ්‍යයන් වෛද්‍ය පර්යේෂණ සිදුකිරීම මත රෝග මර්දනයට එන්නත් හඳුන්වා දීමට වෙහෙස වීම, ලෝක ආර්ථිකයන් කඩා වැටීම ඇතුළු විවිධ කරුණු මත විවිධ රටවලින් විවිධ අන්දමේ පුවත් නිර්මාණය වීම සුලභ වූූ අන්දම දක්නට ලැබිණි. එමෙන්ම, කොරෝනා වසංගතය ට සමගාමීව දේශපාලන භූමිකාව තුළ විවිධ කතිකාවන් නිර්මාණය වීම, වෛරස පාලනය කිරීමේ සාර්ථකභාවය තුළ ධනේෂ්වර පාලන තන්ත්‍රය හා සමාජවාදී පාලන තන්ත්‍රය අතර විවාදාත්මක භූමිකාව ද නොමදව කැපී පෙණින.

ධනේෂ්වර රාජ්‍යයන් අතර, පසුගිය කාලවකවානුව පුරාම කොරෝනා ආශ්‍රිත පුවත් මවන්නකු බවට පත්ව සිටියේ එක්සත් ජනපදයයි. එයට ප්‍රධානතම හේතුව එහි පාලකයා වූ ජනපති ඩොනල්ඩ් ට්‍රම්ප් මහතා ය. කොරෝනා මරණ සංඛ්‍යාව එක්සත් ජනපදයේ ලක්ෂය අභිබවා ගිය මොහොතේ ද ට්‍රම්ප් මහතා ට ප්‍රභලතම ගැටළුව වී තිබුණේ තම ට්විටර් පණිවිඩ සාවද්‍ය යැයි සලකුණු වී තිබීම මිස සුවහසක් මරණ ඉදිරියේ කඳුලු සලන තම ජාතිය නොවේ.

කොරෝනා වකවානුව තුළ ට්‍රම්ප් විසින් සිදුකළ රුවන්වැකි යළි ආවර්ජනය කිරීමට වෙනම ලිපියක් ලිවිය යුතුය. එහෙත් අප කතෘ මණ්ඩලය විසින් මීට ඉහත කොරෝනා කාලේ ට්‍රම්ප් මහතා ගේ වීර ක්‍රියා පිළිබඳව අපමණ ලිපි රචනය වී ඇත. මේ ලියවෙන්නේ ට්‍රම්ප් ගේ දේශපාලන තක්කඩිකම ඉවසනු බැරි තැන ඇමරිකාවේ සෙලිබ්‍රිටියන් දොඩමළු වූ පුවතක් ගැනය.

මීට දින කිහිපයකට ඉහත දී සුදු ජාතික පොලිස් නිලධාරියකු විසින් කළු ජාතිකයකු ගේ ගෙල පාගන දසුනක් සහිත ඡායාරූප සහ වීඩියෝ පට සමාජ මාධ්‍යජාල තුළ වයිරල් ගිය අන්දම ඔබට මතක ඇතැයි සිතමු. ජෝර්ජ් ෆ්ලොයිඩ් නම් මෙම කළු ජාතික තරුණයාගේ ගෙල සිරකරමින් මිනිත්තු 9ක පමණ කාලයක් අදාළ පොලිස් නිලධාරියා සිටීම තුළ ඔහු ජීවිතක්ෂයට පත්ව තිබිණි.

පොලිස් වධහිංසනයෙන් ද අභිබවා ගිය ජාතිවාදී කතිකාවක් මේ හේතුවෙන් හටගත් අතර, මෙය පැහැදිලි මිනීමැරුමක් බවට බොහෝ පාර්ශව විග්‍රහ කර තිබිණි.

ජෝර්ජ් ෆ්ලොයිඩ් ගේ මරණයෙන් උරණ වූ ඇමරිකානු වැසියන් මිනියාපොලිස් නගරයේ උද්ඝෝෂණයක් දියත් කර තිබිණි. ජෝර්ජ් ෆ්ලොයිඩ් ට යුක්තිය ඉල්ලා ආරම්භ වූ මෙම උද්ඝෝෂණය තවමත් ක්‍රියාත්මක වෙමින් පවතී. මෙම උද්ඝෝෂණය මර්දනය කිරීම සඳහා පොලිස් බලය ක්‍රියාත්මක වෙමින් පවතින අතර, උද්ඝෝෂකයින් වෙත පොලීසිය වෙඩි තබන අන්දම ද කැමරා කාචයේ සටහන් වී තිබිණි.

ඩොනල්ඩ් ට්‍රම්ප් ගේ දේශපාලන තක්කඩිකම අවදිවූයේ මෙම මොහොතේදී ය. ඔහු සිය ට්විටර් ගිණුම භාවිතා කරමින් මෙම උද්ඝෝෂණ දියත් කරන පුද්ගලයින් “මැරයින්” බවත්, ඔවුන් ජෝර්ජ් ෆ්ලොයිඩ් ගේ මරණයට නිගරු කරන බවත් පවසා සිටියේ ය.

එමෙන්ම, අසීරුතා හටගන්නා මොහොතක එය පලනය කිරීමට කටයුතු කරන බවද, කලහකාරී හැසිරීම් වලට එදිරිව වෙඩි තැබීම නොවැළැක්විය හැකි බවද හඟවමින්, මෙම උද්ඝෝෂණයට පොලිස් වෙඩිපහර යොමුවන්නේ නම් එය සාධාරණ බව ද හෙතෙම සිය ට්විටර් පණිවුඩය හරහා පවසා සිටියේය.

ට්‍රම්ප් මහතා මෙම ට්විටර් පණිවුඩය නිකුත් කිරීමත් සමඟ අධික විරෝධයක් ට්විටර්ජාලය මඟින් ම නිකුත් වීම ආරම්භ විය. බොහෝ ට්විටර් ගිණුම් හිමියන් ට්‍රම්ප් ගේ ප්‍රකාශය පිළිබඳ සිය අප්‍රසාදය හා පිළිකුල ප්‍රකාශ කර තිබේ. ඒ අතර වඩාත්ම අවධානය යොමුවූ ට්විටර් පණිවුඩය වූයේ සුපිරි ගායිකා ටේලර් ස්විෆ්ට් ගේ ට්විටර් පණිවුඩයයි.

ටේලර් ස්විෆ්ට් යනු බාල මහළු කා අතරත් එක හා සමානව ආදරයට පාත්‍ර වූ ගායිකාවකි. 2006 වර්ෂයේ කන්ට්‍රි ගීත ගායිකාවක් ලෙස බිල්බෝර්ඩ් කරලියට පැමිණි ටේලර් ස්විෆ්ට් අද වන විට සංගීත ලොව ආක්‍රමණය කළ පළමු පෙ‌ළේ සංගීතවේදීන් අතර සිටියි. ‌ටේලර් ස්විෆ්ට් කිසිවිටකත් තම දේශපාලන මතවාදය ප්‍රසිද්ධියේ පළ නොකරන පුද්ගලයකු බවට ඈගේ රසිකයින් හොඳින් දනී. ඇමරිකාව තුළ සිදුවන දේශපාලන හැලහැප්පීම් තුළ බොහෝ සෙලිබ්‍රිටියන් වාචික වන අතර, ටේලර් ස්විෆ්ට් කිසිවිටකත් මෙවන් සිදුවීම් හමුවේ දොඩමළු නොවන චරිතයකි.

එහෙත්, ‌ජෝර්ජ් ෆ්ලොයිඩ් ට සිදුවූ අසාධාරණය හා ට්‍රම්ප් ගේ තක්කඩිකම ඉවසනු බැරි තැන අවසානයේ දොඩමළු වූ ස්විෆ්ට් සිය ට්විටර් ගිණුම හරහා මෙසේ ප්‍රකාශ කර සිටියාය.

“සමස්ත ධුරකාලය තුළම සුදු ආධිපත්‍යයේ හා ජාතිවාදයේ ගිනිදැල් වැපුරූ ඔබ, සදාචාරය උදුම්වා ගනිමින් ප්‍රචණ්ඩත්වය තර්ජනය කිරීමට පැමිණියාද?”

එමෙන්ම එළඹෙන නොවැම්බර් මස ජනාධිපතිවරණයේ දී ට්‍රම්ප්ට ගෙදර යාමට සූදානම් ව සිටින ලෙසද ටේලර් ස්විෆ්ට් පවසා සිටියාය.

මෙය ට්‍රම්ප් විරෝධීන් හට පන්නරයක් වන්නට ඇත, එමෙන්ම ට්‍රම්ප් ගේ ක්‍රියාකලාපය සාධාරණ හා අර්ථාන්විත විවේචනයකට බඳුන් කරන පාර්ශවයන් හට ද රුකුලක් වන්නට ඇත.

ට්‍රම්ප් ගේ ට්විටර් ප්‍රකාශ විවේචනයට තුඩුු දුන් පළමු අවස්ථාව මෙය නොවේ. මීට ඉහත ද බොහෝ අවස්ථාවන් වල ඔහු ප්‍රසිද්ධියේ සිදුකළ දේශපාලනික ප්‍රකාශ හේතුවෙන් බොහෝ විවේචන එල්ල වී තිබිණි. වත්මන් සිදුවීම තුළ උද්ඝෝෂකයින් මර්දනය කිරීමට ප්‍රචණ්ඩත්වය යොදා ගන්නේ ය යන චෝදනාව ට්‍රම්ප් ට සෘජුව එල්ල වී තිබිණි.

මේ සම්බන්ධයෙන් ට්විටර් සමාජ මාධ්‍ය ජාලය ට්‍රම්ප් ට අනතුරු අඟවා තිබිණි. සිය ට්විටර් පණිවුඩ හරහා ප්‍රචණ්ඩත්වය ප්‍රවර්ධනය වන්නේ ය හා ඒවා ට්විටර් සමාජ මාධ්‍ය ජාල රෙගුලාසි උල්ලංඝනය වන්නේය යන්න එහි දැක්විණි.

කෙසේවෙතත් ට්‍රම්ප් මහතා අවධාරණය කර සිටියේ සමාජ මාධ්‍ය ජාල විසින් තමා හට අසාධාරණ අන්දමින් සලකන බවත්, තමා සහ සිය ආධාරකරුවන් ඉලක්ක කර ගනිමින් ඔවුන් මෙසේ සිදුකරන බවත් ය.